Elimizde ıqsham, professional hám nátiyjeli mámleketlik basqarıw sistemasın qáliplestiriw, mámleketlik puqaralıq xızmetiniń huqıqıy hám shólkemlestiriwshilik tiykarların bekkemlew, mámleketlik xızmetkerlerdiń jumısın nátiyjelilikke baǵdarlaw boyınsha keń kólemli reformalar ámelge asırılmaqta. Mámleketlik puqaralıq xızmeti sisteması zaman talaplarına say túrde jetilistirilip barılmaqta.
Parlamenttiń tómengi palatasınıń májilisinde usı máselelerge baylanıslı “Ózbekstan Respublikası Prezidenti Administraciyasınıń strukturası hám mámleketlik puqaralıq xızmeti sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında”ǵı nızam joybarı ekinshi oqıwda kórip shıǵıldı.
Atap ótilgenindey, bul nızam joybarında bajıxana, ishki isler, prokuratura, Milliy gvardiya xızmetkerleri hám sudyalar Administraciya basshısınıń biyligi menen basqa mámleketlik uyımlarǵa yamasa olardıń qaramaǵındaǵı shólkemlerge basqarıw xızmetkeri lawazımlarına ótkende, nızam hújjetlerine muwapıq, olardıń kadrlar rezervine kirgiziliwi yamasa xızmet stajınıń esapqa alınıwı menen baylanıslı normalar názerde tutılmaqta.
Sonday-aq, mámleketlik xızmetke birinshi márte qabıl etilgen xızmetkerler menen miynet shártnaması dáslep bir jıl múddetke dúziliwi, “Mámleketlik xızmetke kiriw” arnawlı kursların hám qánigeligin arttırıw kursların ótiwi jáne insan resursların basqarıwǵa baylanıslı maǵlıwmatlar hám hújjetler tek ǵana “hrm.argos.uz” platformasında qáliplestiriliwi belgilenbekte.
Nızam joybarın ekinshi oqıwǵa tayarlaw procesinde jumısshı topar aǵzaları hám deputatlardıń usınısları tiykarında jetilistirilgeni atap ótildi hám deputatlar tárepinen qabıl etildi.

Muhtarama Komilova,
Asliddin Alijonov (foto), ÓzA