Múnásibet

Aziya Olimpiya keńesiniń 46-Bas assambleyası paytaxtımızda ótkerilgeni, álbette, úlken tariyxıy waqıya boldı. Onda Prezidentimiz Jańa Ózbekstan barlıq mámleketler menen sport tarawında kóp qırlı hám uzaq múddetli birge islesiw ushın ashıq ekenin, sport diplomatiyasın rawajlandırıw hám birgeliktegi baslamalardı alǵa qoyıwǵa tayar ekenin atap ótti.
Búgin Ózbekstanda sport anıq maqsetke baǵdarlanǵan hám nátiyje berip atırǵan bir pútin sistemaǵa aylandı. Sońǵı jılları sport tarawın rawajlandırıw máseleleri tikkeley mámleketimiz Prezidentiniń dıqqat orayında. Ásirese, mámleketimiz basshısı tárepinen keyingi jıllarda Ózbekstanda sport tarawında ámelge asırılǵan keń kólemli jumıslar, zamanagóy sport infrastrukturasınıń qurılıwı, olimpiada hám paralimpiyada háreketlerin qollap-quwatlaw baǵdarındaǵı baslamalar xalıqaralıq jámiyetshilikke anıq mısallar arqalı jetkerildi.
Bul Ózbekstannıń sport tarawında isenimli birge islesiwshi sıpatındaǵı abırayı barǵan sayın artıp atırǵanın kórsetedi. Zamanagóy infrastrukturanı jaratıw, ǵalabalıqtan professional sportqa shekemgi tayarlıqtıń vertikal sistemasın qáliplestiriw, xalıqaralıq standartlardı engiziw, jaslar hám para sporttı qollap-quwatlaw – bulardıń barlıǵı anıq hám ámeliy nátiyjeler bermekte. Búgingi kúnde mámleketimizde 15 millionnan aslam adam ǵalabalıq sport penen qamtıp alınǵan. Dene tárbiyası menen turaqlı shuǵıllanıwshılardıń sanı bolsa derlik bir yarım esege arttı. Bul sanlar tek ǵana esap ushın emes, al keleshektegi jeńislerdiń bekkem tiykarı bolıp, ámeliy jumıslarımızdıń nátiyjesin kórsetpekte. Ásirese ótken 2025-jıl tabıslarǵa bay boldı. Ózbekstan jaslar saylandı komandası pútkil jáhán universiadasında 13-orındı iyeledi. Baxreynde ótken jaslar Aziya oyınları hám Saudiya Arabstanındaǵı Islam tileklesligi oyınlarında 2-orındı qolǵa kirgizdi. Birlesken Arab Ámirlikleri basshılıǵında ótkerilgen jas óspirimler arasındaǵı Para Aziya oyınlarında bolsa Ózbekstan delegaciyası 1-orındı iyeledi. Futbol boyınsha milliy saylandı komandamız mámleket tariyxında birinshi márte jáhán chempionatına jollamanı qolǵa kirgizdi. Tarawdaǵı bunday ámeliy jumıslardıń haqıyqıy bahası xalıqaralıq sport jámiyetshiliginiń isenimi bolıp esaplanadı.
Usı jıldıń 24-27-yanvar kúnleri Aziya kontinentiniń túrli múyeshlerinen 45 mámleketten mıńlaǵan sport tarawınıń qánigeleri Ózbekstanǵa keldi. 45 bayraq 45 mámlekettiń Olimpiada komitetleri áyne usı jerde qatnaspaqta. Biz keyingi jılları mámleketimizde bul formattaǵı ushırasıwlardı júdá kóp márte kórip atırmız. Máselen, tek ǵana 2025-jıldıń ózinde Ózbekstan 50 den aslam mine, usınday úlken hám kishi ilajlarǵa basshılıq etti. Jańa 2026-jıldı jáne mine, usınday úlken ilaj menen baslap atırmız. Maǵlıwmat ornında bul xalıqaralıq ilajǵa Tashkenttiń basshılıq etiwi haqqındaǵı qarar 2025-jılı Kuveytte qabıl etilgen edi. Qabıl etiwshi mámleket ushın bul tek ǵana abıraylı ilaj emes, al shólkemlestiriw potencialın kórsetiw, xalıqaralıq baylanıslardı bekkemlew, investiciyalardı tartıw hám regionallıq sport siyasatınıń orayı sıpatında ózin kórsetiw imkaniyatı bolıp, ámelde óz tastıyıǵın taptı.
Búgingi kúnde Ózbekstan ishki hám sırtqı siyasatta da jedel ózgerislerdi ámelge asırmaqta. Mámleketimiz sport tarawında jańadan-jańa usınıs hám baslamalardı kirgiziwge tayar ekenin kórsetpekte. Bir neshe kún dawamında Tashkent Aziya sportı diplomatiyasınıń orayına aylanadı. Kún tártibinde Aziya Olimpiada keńesi basshıların saylaw, kontinent sportınıń keleshegine baylanıslı qararlar, iri jarıslardı ótkeriw máseleleri, sport basqarıwında ashıq-aydınlıq hám reformalar, jaslar hám hayal-qızlar sportın rawajlandırıw, sanlastırıw hám zamanagóy basqarıw usılların engiziw, sanlı transformaciya, jaslarǵa tiykarǵı itibar hám sonıń menen birge, parallel túrde globallıq kólemdegi ushırasıwlar orın alǵan. Aziya Olimpiya keńesi 45 Milliy Olimpiya komitetin birlestirgen kontinenttegi eń iri sport shólkemi bolıp esaplanadı. Onıń Bas Assambleyası bolsa Keńestiń eń joqarı qarar qabıl etiwshi uyımı bolıp, bul jerde tek ǵana shólkemlestiriw máseleleri emes, al Aziya sportınıń siyasiy, ekonomikalıq hám institucionallıq rawajlanıwı dodalanadı.
Mámleketimiz basshısınıń shıǵıp sóylegen sózinde alǵa qoyılǵan áhmiyetli baslamalardan jáne biri – Aziya mámleketleri arasında sport tarawındaǵı birge islesiwdi keńeytiw, tájiriybe almasıw hám qospa joybarlardı ámelge asırıw máselesi bolıp esaplanadı. Bul usınıslar kontinentte salamat báseki, professional sport hám jas talantlılardı qollap-quwatlaw sistemasın jáne de bekkemlewge xızmet etedi.
Deputat sıpatında sonı ayrıqsha atap ótiwdi qáler edim, Prezident Shavkat Mirziyoevtiń bul shıǵıp sóylegen sózi sport tarawın mámleketlik siyasattıń tiykarǵı baǵdarlarınan biri sıpatında belgilep bergeni menen de áhmiyetli. Sportqa kirgizilip atırǵan investiciyalar, nızamshılıq tiykarlarınıń jetilistiriliwi hám xalıqaralıq birge islesiwge ashıqlıq – bulardıń barlıǵı mámleketimiz jaslarınıń fizikalıq jaqtan salamat, ruwxıy jaqtan bárkamal bolıp kamalǵa keliwine xızmet etpekte.
Juwmaqlap aytqanda, Aziya Olimpiya keńesiniń 46-Bas assambleyasındaǵı bul shıǵıp sóylew Ózbekstannıń ashıq, tınıshlıq súyer hám birge islesiwge tayar mámleket ekenin jáne bir márte kórsetti. Sport arqalı xalıqlardı birlestiriw, jaslarǵa isenim baǵıshlaw hám keleshekke úmit oyatıw ideyası mámleketimiz siyasatındaǵı tiykarǵı baǵdar ekenin bul shıǵıp sóylew jáne de ayqın kórsetti.

Guljan Xalmuratova,
Oliy Majlis Nızamshılıq palatasınıń deputatı, ÓzLiDeP frakciyasınıń aǵzası.
Qaraqalpaqstan xabar agentligi