Geosiyasiy báseki keskinlesip atırǵan sharayatta tınıshlıqtı saqlaw, kelispewshiliklerdi siyasiy hám diplomatiyalıq jollar menen sheshiw máselesi dúnya jámiyetshiligi ushın tiykarǵı wazıypaǵa aylandı. “Tınıshlıq keńesi” xalıqaralıq formatı qurallı qarama-qarsılıqlarǵa shek qoyıw, kelispewshiliklerdi áskeriy emes, al siyasiy sóylesiw hám diplomatiyalıq kelisimler tiykarında sheshiwge qaratılǵan nátiyjeli platforma sıpatında qáliplestirilmekte.
Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti baslıǵınıń orınbasarı Odiljan Mamatkarimov bul boyınsha múnásibet bildirdi:
– Itibarlı tárepi sonda, Ózbekstan “Tınıshlıq keńesi”ne shólkemlestiriwshi mámleket sıpatında mirát etildi. Mámleketimiz basshısı Davos qalasında usı keńestiń rejesine qol qoyıw máresiminde qatnasqanı, bir qatar eki tárepleme ushırasıwlar ótkergeni elimizdiń xalıqaralıq maydandaǵı abırayı hám siyasiy salmaǵı jáne de artqanın ayqın kórsetti.
Bul qádem Ózbekstannıń globallıq tınıshlıq hám turaqlılıq máselelerinde belsendi hám juwapkershilikli qatnasıwshı sıpatındaǵı ornı bekkemlenip atırǵanınan derek berdi.
“Tınıshlıq keńesi” jumısınıń tiykarǵı maqseti – qurallı kelispewshiliklerdi basqıshpa-basqısh saplastırıw, mámleketler arasında isenimge tiykarlanǵan diplomatiyalıq sóylesiw maydanın jaratıw, gumanitarlıq hám sociallıq turaqlılıqtı támiyinlew jáne regionallıq qáwipsizlikti bekkemlewden ibarat. Sonday-aq, keńestiń jumısı xalıqaralıq huqıq normaları hám BMSh rezolyuciyalarına súyengen halda, ámeliy hám tásirsheń qararlar qabıl etiwge qaratılǵanı menen áhmiyetli.
Ózbekstannıń bul strukturada shólkemlestiriwshi mámleket sıpatında qatnasıwı mámlekettiń keyingi jıllarda qáliplesken sırtqı siyasatınıń kóp tárepleme, ashıq-aydın hám pragmatikalıq jolı menen tıǵız baylanıslı. Prezident Shavkat Mirziyoevtiń basshılıǵında Ózbekstan sırtqı siyasatı “urıs emes – qarım-qatnas”, “májbúrlew emes – kelisim” principlerine tiykarlanıp, regionallıq hám globallıq turaqlılıqqa úles qosıwdı tiykarǵı wazıypa sıpatında belgilep aldı.
Mámleketimiz xalıqaralıq kelispewshiliklerge ádil hám teń salmaqlı poziciyanı iyelep, kelispewshiliklerdi tınısh jollar menen sheshiw tárepdarı ekenligi menen ajıralıp turadı.
Ásirese, Awǵanstan máselesindegi konstruktivlik qatnas, Oraylıq Aziyada isenim ortalıǵın qáliplestiriwge qaratılǵan baslamalar Ózbekstandı xalıqaralıq maydanda isenimli hám konstruktivlik sherik sıpatında kórsetti.
“Tınıshlıq keńesi” sheńberinde de mámleketimiz mine usı bay tájiriybe hám kózqaraslar menen belsene qatnasıwı múmkin.
Áhmiyetlisi sonda, Ózbekstan hesh qanday áskeriy bloklarǵa qosılmastan, óziniń erkin hám teń salmaqlı poziciyasın saqlap qalǵan halda, globallıq tınıshlıqqa baylanıslı máselelerde jedel intaker bolıp shıqpaqta. Bul bolsa, mámlekettiń sırtqı siyasatındaǵı pragmatizm, ashıq-aydınlıq hám milliy máplerdiń únlesliginiń ayqın úlgisi bolıp esaplanadı.
Juwmaq ornında aytıw kerek, Ózbekstannıń “Tınıshlıq keńesi” jumısında shólkemlestiriwshi mámleket sıpatında qatnasıwı mámlekettiń tınıshlıq súyiwshi sırtqı siyasatı jańa, sapa jaǵınan joqarı basqıshqa kóterilgenin ańlatadı.
Bul baslama arqalı Ózbekstan xalıqaralıq kelispewshiliklerdi sheshiwde tek ǵana baqlawshı emes, al konstruktivlik usınıslar hám sheshimler menen shıǵatuǵın belsendi qatnasıwshı sıpatında kórsetilmekte.
Bul qádem mámlekettiń xalıqaralıq maydandaǵı isenimin bekkemlep, onı turaqlılıq, qarım-qatnas hám óz-ara paydaǵa tiykarlanǵan birge islesiwdi alǵa qoyıp kiyatırǵan mámleket sıpatında jáne de bekkem qáliplesiwine xızmet etedi. Bul, óz gezeginde, Ózbekstannıń siyasiy tásir sheńberi, diplomatiyalıq imkaniyatları jáne globallıq processlerdegi roli keńeyip atırǵanın kórsetedi.
Eń áhmiyetlisi, “Tınıshlıq keńesi”nde qatnasıw qısqa múddetli siyasiy paydaǵa emes, al uzaq keleshekte regionallıq hám globallıq tınıshlıqtı támiyinlew arqalı milliy máplerdi bekkemlewge qaratılǵan sanalı hám juwapkershilikli tańlaw bolıp tabıladı. Bul qatnas mámleketimiz keleshegin turaqlılıq, rawajlanıw hám qáwipsizlik penen baylanıstırıwǵa xızmet etedi.
Usı mániste, Ózbekstan tańlaǵan sırtqı siyasat jolı – ashıq sóylesiw, óz-ara isenim hám birge islesiwge tiykarlanǵan tınıshlıq strategiyası bolıp esaplanadı. Bul mámleketimizdiń strategiyalıq máplerine tolıq sáykes keledi hám uzaq múddetli rawajlanıw ushın bekkem tiykar jaratadı.

ÓzAnıń xabarshısı
Norgul ABDURAIMOVA
jazıp aldı.