Mámleketimizde qurılıs tarawın rawajlandırıw, xalıqtıń turmıs dárejesin arttırıw hám aymaqlardı kompleksli rawajlandırıwǵa qaratılǵan keń kólemli reformalar izbe-iz ámelge asırılmaqta. Sońǵı jılları qala qurılısı normaları jetilistirilip, injenerlik-kommunikaciya infrastrukturasın rawajlandırıwǵa ayrıqsha itibar qaratılmaqta.
Qaraqalpaqstan Respublikası Ministrler Keńesiniń Baslıǵı F.Ermanov qurılıs tarawında jol qoyılıp atırǵan kemshilikler, rejelerdiń orınlanıwındaǵı nemquraydılıq hám mashqalalardı saplastırıw máselelerine baǵıshlanǵan májilis ótkerdi.
Májiliste qurılıs tarawınıń juwapker basshıları hám juwapker shólkemlerdiń wákilleri qatnastı.
Onda qurılıs obektlerinde alıp barılıp atırǵan jumıslardıń jaǵdayı dodalanıp, bir qatar joybarlarda belgilengen múddetlerge ámel etilmey, sapa talaplarınıń jeterli dárejede támiyinlenbey atırǵanı keskin sınǵa alındı. Sonıń ishinde ayırım juwapkerler tárepinen qadaǵalawdıń tómen jolǵa qoyılǵanı, mashqalalarǵa júzeki, ústirtin qatnasta bolıp atırǵanı atap ótildi.
Májilis dawamında juwapker basshılardıń esabatları tıńlanıp, anıqlanǵan kemshilikler boyınsha anıq múddetler hám juwapkerler belgilenip, qurılısta jumıs sapasın arttırıw, qadaǵalaw mexanizmlerin kúsheytiw, orınlaw tártibin támiyinlew boyınsha qatań tapsırmalar berilip, wazıypalardıń orınlanıwına nemquraydılıq penen qaraǵan lawazımlı shaxslarǵa tiyisli sharalar kóriliwi eskertildi.
Májilis juwmaǵında qurılıs tarawında tártip-intizamdı kúsheytiw, hár bir obekt boyınsha jeke juwapkershilikti belgilew, xalıqqa qolaylı hám qáwipsiz jasaw ortalıǵın jaratıw tiykarǵı wazıypa ekeni jáne bir márte qatań atap ótildi.

Qaraqalpaqstan xabar agentligi