Sporttıń Awır atletika túri boyınsha Rio-2016 Olimpiada chempionı Ruslan Nuriddinov respublikamızda bolıp, trener hám sportshılar menen ushırastı. Óziniń sport tarawına qashan kirip kelgenligi hámde jetiskenlikleri boyınsha sáwbetler ótkerdi.
Bunnan soń ol óziniń tájiriybeleri menen bólisiw maqsetinde Nókis qalası, Taqıyatas hám Shomanay rayonı sportshıları menen ushırasıp, sheberlik sabaǵın ótti. Ótkerilgen ilajlarda xalıqaralıq taypadaǵı sport ustası, 5 márte Ózbekstan chempionı, Aziya chempionı, Ózbekstan hám Qaraqalpaqstanda xızmet kórsetken sportshı Rustam Jańabaev ta qatnastı.
Bul ushırasıwlardıń tiykarǵı maqseti jaslar arasında sportqa bolǵan qızıǵıwshılıqtı jáne de arttırıw, salamat turmıs tárizin úgit-násiyatlaw hám elimizdiń abırayın xalıqaralıq maydanlarda múnásip qorǵaytuǵın keleshek chempionların tárbiyalawdan ibarat.
Ushırasıw dawamında chempion sportshılar turmıslıq tájiriybeleri, mashaqatlı miyneti arqalı erisilgen jetiskenliklerin jaslar menen bólisti. Bul bolsa jaslarǵa úlken motivaciya dáregi bolıp xızmet etedi.
– Bunday imkaniyatlar jaratılǵan rayonnan bir neshe Olimpiada chempionı shıǵıwı shárt,-dedi olimpiada chempionı Taqıyatas rayonında jańadan qurılǵan awır atletika zalında bolıp ótken master-klass payıtında jaratılǵan imkaniyatlar menen tanısıp.
Sportshı jaslar chempionǵa ózleriniń qızıqtırǵan sorawların berip, tiyisli juwaplar aldı. Sonday-aq, awır atletika sport túriniń ózine tán bolǵan shınıǵıw usılların chepionnıń orınlawında gúwası bolıp, ózlerine úlgi aldı. Bul ushırasıw respublikamızdan aldaǵı waqıtlarda dúnyaǵa belgili chempionlardıń jetisiw shıǵıwına tiykar boları anıq.
Maǵlıwmat ushın; R.Nuriddinov xalıqaralıq taypadaǵı sport sheberi, 10 márte Ózbekstan chempionı, 5 márte Aziya chempionı, 3 márte jáhán chempionı, 2016-jıl Rio-de-Janeyro qalasında bolıp ótken jazǵı Olimpiada oyınlarınıń altın medal iyesi hám rekordshısı, Ózbekstanda xızmet kórsetken sportshı.
Ol -105 kg hám keyin ala -109 kg salmaq kategoriyalarında Jáhán kólemindegi eń kúshli atletlerden biri sıpatında tanılǵan.

Qaraqalpaqstan xabar agentligi