Ózbekstanda xalıqtı turaq jay menen támiyinlew hám zamanagóy transport quralların satıp alıw imkaniyatların keńeytiwge qaratılǵan jańa reformalar basqıshpa-basqısh ámelge asırılmaqta.
Prezidentimizdiń “Ózbekstan – 2030” strategiyası hám bıyılǵı jıl ushın belgilengen tiykarǵı wazıypalardıń orınlanıwı sheńberinde ipoteka hám avtokreditler sistemasın jetilistiriwge qaratılǵan párman joybarı jámiyetshiliktiń dodalawına qoyıldı.
Bul hújjet xalıq ushın ipoteka kreditleriniń muǵdarın arttırıw, elektromobiller satıp alıwdı xoshametlew hám kredit júgin azaytıwǵa qaratılǵan anıq mexanizmlerdi óz ishine aladı.
Párman joybarı 2026-jılı ipoteka hám avtokredit sistemasın jetilistiriw, sonıń ishinde, islep shıǵılǵan elektromobiller hám turaq jayǵa kredit beriwdi jáne de xoshametlewge qaratılǵan keń kólemli ilajlardan ibarat. Joybar mámleket ekonomikası hám xalıqtıń turmıs dárejesin arttırıwǵa xızmet etedi.
Prezidenttiń baslaması menen ipoteka kreditleriniń muǵdarı sezilerli dárejede arttırılmaqta. Tashkent qalasında bir kvartira ushın ajıratılatuǵın ipoteka kreditiniń muǵdarı 480 million sumǵa shekem jetedi. Aymaqlarda bolsa bul muǵdar 380 million sumǵa shekem belgilenedi.
2026-jılı jámi 23 trillion sum muǵdarında ipoteka kreditleriniń ajıratılıwı rejelestirilgen bolıp, bul mámleketlik byudjet, kommerciyalıq bankler hám arnawlı qarjılandırıw kompaniyaları esabınan ámelge asırıladı.
Ipoteka kreditleri menen baylanıslı subsidiyalar da arttırıladı. Procent tólemleriniń bir bólegi hám dáslepki tólem bólegi mámleket tárepinen qaplanıwı belgilengen. Bul puqaralar ushın turaq jay satıp alıwdı jáne de qolaylı etedi.
Joybar sheńberinde ekologiyalıq taza transporttı xoshametlew maqsetinde tómendegi jańalanǵan mexanizmler engiziledi. Elektromobil satıp alıw ushın 12 procent hám 16 procentlik kreditler beriledi. Jergilikli elektromobiller ushın 12 procent, import etilgen elektromobiller ushın bolsa 16 procentlik kreditler beriledi.
Bul kreditler boyınsha banklerden alınǵan procenttiń joqarı bólegi mámleket tárepinen subsidiyalanadı, yaǵnıy puqaralarǵa qarızdı tólew jeńillestiriledi.
Elektromobillerdi quwatlaw stanciyaların qurıw ushın isbilermenlerge 10 procentlik maqsetli kreditler ajıratıladı. Bul stanciyalardı shólkemlestiriw, energiya sistemasına jalǵaw hám xızmet kórsetiw ushın qosımsha subsidiyalar hám jeńillikler belgilenedi.
Bunnan tısqarı, elektromobiller bazarın rawajlandırıw strategiyası sheńberinde mámlekette joqarı ekologiyalıq standartlarǵa tiykarlanǵan infrastruktura jaratıw rejelestirilgen.

ÓzA