Qaraqalpaqstan Respublikası Joqarǵı Keńesiniń Baslıǵı Amanbay Orınbaev xalıqtıń abadan turmısın támiyinlew hám isbilermenlikti rawajlandırıw baǵdarında ámelge asırılǵan jumıslar menen tanısıw maqsetinde Bozataw rayonına bardı.
Respublikamız basshısı eń dáslep, Erkindárya awıl puqaralar jıyınında intensiv baǵ jaratıw joybarı hám Qusxanataw elatında jaylasqan toǵay xojalıǵınıń nálxanasın kózden ótkerdi. Bunnan soń Bozataw sanatoriyasında xalıqtı sawallandırıw boyınsha xalıqqa kórsetilip atırǵan xızmetler menen jaqınnan tanısıp, jańa sanatoriyanıń imkaniyatlarınan tolıq paydalanıw boyınsha juwapkerlerge tiyisli tapsırmalar berdi.
Sonday-aq, rayonda ámelge asırılıp atırǵan jumıslar menen tanısıw barısında Bozataw posyolkasındaǵı «Bozataw tekstil» kárxanası tárepinen tigiw hám trikotaj ónimlerin islep shıǵarıw, «Kenjebek Dáwletyar» JShJ tárepinen xızmet kórsetiw hám ulıwma awqatlanıw orayın shólkemlestiriw, bunnan tısqarı, isbilermenler ushın zárúr infrastruktura jaratıw arqalı sawda hám xızmet kórsetiw obektlerin iske túsiriw joybarları úyrenildi. Isbilermenlerdiń bul jumısların rawajlandırıwı ushın olarǵa jaqınnan járdem beriw boyınsha juwapkerlerge anıq tapsırmalar berildi.
Sonıń menen birge, «Berdaq gúzarı» kóshesi boyında jańadan qurılıp atırǵan kóp qabatlı turaq jaydıń qurılıs barısı da kózden ótkerilip, jumıslardı sapalı hám óz waqtında pitkeriw boyınsha wazıypalar tapsırıldı.
Usılar menen bir qatarda, Erkindárya awıl puqaralar jıyını aymaǵındaǵı mektepke shekemgi bilimlendiriw shólkeminiń jılıtıw sisteması jumıslarınıń da respublikamız basshısınıń itibarınan shette qalmadı.
Bunnan soń, rayon aymaǵındaǵı máhálle hám awıllarda xalıqtıń kúndelikli turmısı menen baylanıslı mashqalalardı tıńlaw alıw maqsetinde, aymaq nuraniyleri hám kóshe biyleri menen pikirlesti.
Sońınan rayon hákimliginiń májilisler zalında Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonın sociallıq-ekonomikalıq jaqtan rawajlandırıw máselelerine baǵıshlanǵan májilis ótkerdi.
Oǵan rayon basshıları, deputatlar hám aymaqtaǵı mákeme-shólkemlerdiń baslıqları qatnastı. Májiliste respublikamız basshısı tárepinen aymaqtıń turmıslıq sharayatın jaqsılaw baǵdarında ámelge asırılıwı tiyis wazıypalar, kámbaǵallıqtı qısqartıw, xalıqtıń bántligin támiyinlew hám investiciyalıq joybarlardı ámelge asırıw baǵdarındaǵı berilgen tapsırmalardıń orınlanıw barısı sın kózqarasta kórip shıǵıldı.
Atap aytqanda, aymaqta orın alǵan máselelerdi sheshiw boyınsha rayonda barlıq imkaniyatlar bar ekenligi, húrmetli Prezidentimizdiń arnawlı Párman hám qararları tiykarında, olarǵa zárúrli múmkinshilikler jaratıp berilgenine qaramastan, ayırım orınlarda artta qalıwshılıqlarǵa jol qoyılıp atırǵanlıǵı qatań sınǵa alındı.
Sonıń ishinde, xalıqtıń tikkeley kewil-keypiyatına tásir etiwshi mashqalalardı sheshiw baǵdarındaǵı ishki jollardı ońlaw, jaǵdayı awır elatlardı abadanlastırıw, qurılıs tarawı, kámbaǵallıq reestrine kirgizilgen shańaraqlar menen birge islesiw sıyaqlı bir qatar máselelerde kemshiliklerge jol qoyılmaqta. Májiliste usı sıyaqlı mashqalalar, jol qoyılǵan kemshilikler kórsetip berildi.
Ótkerilgen májilis dawamında jedel isleniwi tiyis wazıypalar belgilenip, juwapker basshılarǵa anıq tapsırmalar berildi. Sonıń menen birge, óziniń xızmet wazıypasın orınlawda kemshiliklerge jol qoyǵanı ushın 5 lawazımlı shaxstıń lawazımına ılayıqlıǵı máselesin kórip shıǵıw tapsırılıp, 6 lawazımlı shaxsqa intizamiy jaza sharası qollanıldı.

Qaraqalpaqstan xabar agentligi