Húrmetli bajıxana uyımları xızmetkerleri!
Qádirli serjantlar, oficerler hám generallar!
Húrmetli veteranlar!
Sizlerdi 26-yanvar – Ózbekstan Respublikası mámleketlik bajıxana xızmeti uyımları xızmetkerleri kúni menen qızǵın qutlıqlayman.
Ǵárezsizlik jıllarında bajıxana uyımları mámleketimizdiń ekonomikalıq qáwipsizligin támiyinlew, milliy máplerimizdi qorǵaw hám shegaralarımızdıń qol qatılmaslıǵın saqlawda mámlekettiń isenimli tayanıshı bolıp kelmekte.
Atap aytqanda, Jańa Ózbekstan sharayatında bajıxana uyımları zamanagóy, ashıq hám nátiyjeli sistemaǵa aylanıp, elimizdiń rawajlanıwına múnásip úles qospaqta.
Sizlerdiń bilim hám tájiriybeńiz, kásiplik sheberlik hám isenimińiz mámleketimizdiń ekonomikalıq turaqlılıǵın bekkemlewge xızmet etpekte. Ásirese, tarawdı sanlastırıw, artıqsha byurokratiya hám insan faktorın azaytıw hám xalıqaralıq standartlardı engiziw baǵdarındaǵı ámeliy jumıslarıńız ayrıqsha itibarǵa ılayıq.
Tarawdaǵı túpkilikli reformalar sebepli keyingi jıllarda bajıxana rásmiylestiriwi waqtı 40 procentke qısqartıldı, deklaraciyalardıń 20 procenti insan faktorısız ámelge asırılmaqta. 2025-jılı 76,2 trillion sum bajıxana tólemleri óndirilip, bul kórsetkish 21 procentke arttı hám onıń mámleketlik byudjet dáramatlarındaǵı úlesi 25 procentke jetti.
Sonday-aq, 1,2 trillion sumlıq tovarlardıń nızamsız aylanısına shek qoyıldı. Qáwiplerdi aldınnan tallaw nátiyjesinde 7 trillion sum, tovarlardı rásmiy importqa tartıw arqalı qosımsha 2,3 trillion sum byudjet qarjısı óndiriliwi támiyinlendi.
Sonıń menen birge, 1,8 tonna náshebentlik, 1,1 tonna psixotrop hám kúshli tásir etetuǵın elementlerdiń nızamsız aylanısına shek qoyıldı. Jáhán sawda shólkeminiń talapları tiykarında bajıxana tártip-qaǵıydaları ápiwayılastırıldı. Jáhán bajıxana shólkemi menen nátiyjeli birge islesiw jolǵa qoyıldı. Jańa Ózbekstan bajıxanasınıń xalıqaralıq abırayı artıp barmaqta.
Mámleketimiz bajıxana laboratoriyası hám kinologiya orayınıń regionallıq filial statusına iye bolıwı, Bajıxana institutınıń “PICARD” baǵdarlaması standartları tiykarında akkreditaciyadan ótiwi, bajıxana uyımımızdıń usı shólkemniń Audit komitetiniń aǵzalıǵına saylanıwı da sonnan derek beredi. Bajıxana sistemasında bilimli, intaker jas kadrlardıń qatarınıń keńeyip atırǵanı, olardıń maman xalıqaralıq ekspertler sıpatında tán alınıp atırǵanı quwanıshlı.
Qádirli taraw wákilleri!
Búgingi qıyın zamanda ekonomikalıq qáwipsizlikti támiyinlew, sonıń ishinde, kelesi bes jılda “jasırın ekonomika” úlesin eki esege qısqartıwda bajıxana uyımlarınıń jumısın kúsheytiw – áhmiyetli wazıypa bolıp esaplanadı. Ásirese, mámleketimizdiń Jáhán sawda shólkemine aǵza bolıp kiriwi múnásibeti menen bajıxana sistemasınıń jumıs nátiyjeliligi hám juwapkershiligin túpkilikli arttırıw zárúr.
Sonıń ushın tarawdı hár tárepleme rawajlandırıw, onıń materiallıq-texnikalıq bazasın hám kadrlar potencialın bekkemlew, xızmetkerlerdiń miynetin múnásip xoshametlew turaqlı itibarımız orayında boladı. Bul dańqlı áyyyamda óz xızmet wazıypasın orınlaw waqtında qaza bolǵan márt hám batır xızmetkerlerdiń esteligin húrmet penen eslep, olardıń shańaraqları hám perzentlerine jaqsı tileklerimizdi jollaymız.
Húrmetli bajıxana uyımları xızmetkerleri!
Húrmetli veteranlar!
Sizlerdi jáne bir márte shın júrekten qutlıqlap, bársheńizge bekkem densawlıq, shańaraqlarıńızǵa qut-bereket tileymen.
Juwapkershilikli hám maqtanıshlı xızmetińizde jańa jetiskenlik hám tabıslar yar bolsın!

Shavkat Mirziyoev,
Ózbekstan Respublikası Prezidenti