Ájiniyaz atındaǵı Nókis mámleketlik pedagogikalıq institutında Ózbekstan Liberal-demokratiyalıq partiyası Qaraqalpaqstan Respublikası Keńesiniń baslaması menen jetilistirilip atırǵan “Ózbekstan – 2030” strategiyası hám Ózbekstan Respublikası Prezidenti Shavkat Miromonovich Mirziyoevtiń Oliy Majlis hám Ózbekstan xalqına jollaǵan náwbettegi Múrájatınıń mazmun-mánisine baǵıshlanǵan úgit-násiyat ilajı shólkemlestirildi.
Ilajdıń tiykarǵı maqseti mámleketimizde ámelge asırılıp atırǵan keń kólemli reformalar sheńberinde “Ózbekstan – 2030” strategiyasında belgilengen wazıypalardıń orınlanıwı, ótken dáwir dawamında erisilgen anıq nátiyjeler, ónimdarlıq kórsetkishleri, sonday-aq, onı jetilistiriw zárúrligi hám kelesi bes jıllıq rawajlanıwdıń tiykarǵı baǵdarları boyınsha joqarı bilimlendiriw mákemeleriniń jámáátleri arasında keń túrde túsindiriw hám ashıq dodalawlar ótkeriwden ibarat boldı.
Ilajda Qaraqalpaqstan Respublikası Joqarǵı Keńesiniń deputatı Almagúl Bayrıeva, ÓzLiDeP Qaraqalpaqstan Respublikası Keńesiniń juwaplı xızmetkerleri, joqarı oqıw orınlarınıń professor-oqıtıwshıları, student-jaslar hám ǵalaba xabar qurallarınıń wákilleri qatnastı.
Ushırasıw dawamında Prezident Múrájatında belgilengen tiykarǵı wazıypalar hám onıń tiykarında jetilistirilip atırǵan “Ózbekstan – 2030” strategiyasınıń maqset hám wazıypaları keńnen túsindirildi. Atap ótilgenindey, bul strategiya mámlekettiń orta múddetli rawajlanıw jolın belgilep berip, ekonomikanı rawajlandırıw, xalıqtıń abadanlıǵın arttırıw, bilimlendiriw, densawlıqtı saqlaw, sociallıq qorǵaw sistemasın jetilistiriw, mámleketlik basqarıwdı sanlastırıw hám aymaqlardı kompleksli rawajlandırıwǵa qaratılǵan áhmiyetli wazıypalardı óz ishine aladı.
Sonday-aq, ilaj dawamında strategiya sheńberindegi bilimlendiriwdiń sapasın arttırıw, ilimdi qollap-quwatlaw, isbilermenlikti rawajlandırıw, mámleketlik xızmetlerdi proaktiv hám kompozit tárizde kórsetiw arqalı byurokratiyalıq tosıqlardı saplastırıw hám puqaralar ushın qolaylıqlardı keńeytiw máselelerine ayrıqsha itibar qaratıldı.
– Jetilistirilip atırǵan “Ózbekstan – 2030” strategiyasınıń tiykarǵı maqseti “Xalıq mámleketlik uyımlarǵa emes, mámleketlik uyımlar xalqımızǵa xızmet etiwi kerek” degen principti ámeliy mazmun menen bayıtqan halda, mámlekettiń orta múddetli rawajlanıw jolın jáne de tásirsheń, nátiyjege baǵdarlanǵan hám esap beriwshi sistema tiykarında dawam ettiriwden ibarat, – dep atap ótti deputat A.Bayrıeva.
Ilaj juwmaǵında qatnasıwshılar tárepinen bildirilgen pikir-usınıslar “Ózbekstan – 2030” strategiyasın jetilistiriw, onı xalıqtıń máplerine jáne de jaqınlastırıwda úlken áhmiyetke iye ekeni atap ótildi.

Qaraqalpaqstan xabar agentligi