Hayal-qızlardıń isbilermenlik penen shuǵıllanıwın qollap-quwatlaw, olardıń biznes baslamaların xoshametlew hám jámiyettegi ekonomikalıq belsendiligin arttırıw maqsetinde ÓzLiDeP tárepinen “Máhálleniń isbilermen hayalı” joybarı sheńberindegi tańlawdıń bıyılǵı máwsimine rásmiy start berildi.
ÓzLiDeP Qaraqalpaqstan Respublikası Hayal-qızlar qanatı hám Nókis qalalıq Keńesi menen birgelikte Nókis qalasında jaylasqan “Nawqan baǵ” mákan puqaralar jıyınında tańlaw bolıp ótip, onda máhállede xızmet kórsetip atırǵan isbilermen hayal-qızlar ózleriniń ámelge asırǵan biznes joybarları, qol miyneti hám óndiriske qaratılǵan baslamaları menen qatnastı.
Qatnasıwshılar tóreshiler quramına óz iskerligi, erisken nátiyjeleri, ónimniń sapası hám kólemi, sonday-aq, keleshektegi reje hám maqsetleri haqqında tolıq maǵlıwmat berdi. Tóreshiler tárepinen qatnasıwshılardıń belsendiligi, innovaciyalıq kózqarası hám jergilikli bazarda talap joqarı bolǵan ónimler islep shıǵarıp atırǵanı ayrıqsha atap ótildi.
Tańlaw nátiyjelerine muwapıq, Mehriban Utemuratova 1-orın jeńimpazı dep tabıldı. Ol 2023-jıldan berli yarım tayar azıq-awqat ónimlerin islep shıǵarıw menen shuǵıllanıp kelmekte. Házirgi kúnde kúnlik 50-80 kilogramm kólemde 11 túrdegi yarım tayar ónimlerdi tayarlap, jergilikli azıq-awqat dúkanlarına jetkerip bermekte. Mehribannıń iskerligi máhállede jańa jumıs orınların jaratıw, xalıqtı sapalı hám qáwipsiz azıq-awqat ónimleri menen támiyinlewge xızmet etpekte.
Sonday-aq, tańlawda ónerment Aygúl Koyshıbaeva qol miyneti tiykarında hár qıylı sebet ónimleri menen, Roza Nurıshova milliy kiyimler tigiw baǵdarındaǵı miynetleri menen, Gúlzada Esimbetova bolsa pilleshilik tarawındaǵı nátiyjeli miyneti menen qatnastı. Olardıń hár biri óz baǵdarında jergilikli ónermenshilikti saqlaw hám rawajlandırıwǵa múnásip úles qosıp kelmekte. Tóreshiler tárepinen qatnasıwshılardıń belsendiligi, innovaciyalıq kózqarası hám jergilikli bazarda talap joqarı bolǵan ónimler islep shıǵarıp atırǵanı ayrıqsha atap ótildi.
Ilaj dawamında qatnasıwshılardıń biznes ideyaları, dóretiwshilik kózqarası hám máhállede isbilermenlik ortalıǵın jaqsılawǵa qaratılǵan jumısı joqarı bahalandı.

Qaraqalpaqstan xabar agentligi