Jaqında Nókis qalasında jámiyetlik transport xızmetin rawajlandırıw maqsetinde «Sapsan Trans Nókis» kárxanası tárepinen Qıtay mámleketinen 24 mlrd. sumlıq qarjı esabınan 12 elektrobus alıp kelingen edi.
Búgin 23-yanvar kúni saat 08:00 den baslap Nókis qalasında eksperiment tárizde jolawshılarǵa xızmet kórsetiwdi basladı. Atap aytqanda, 1A-sanlı elektrobus “Temir jol vokzal-Nókis arqa batıs avtovokzal”, 10A-sanlı elektrobus “Qızketken elatı-Samanbay elatı” (Dosnazarov kóshesi arqalı) hám 24A-sanlı elektrobus “Nókis arqa batıs avtovokzal-Áskeriy prokuratura” jónelisleri boyınsha háreket etip, xalqımızdıń alǵısına miyasar bolmaqta.
– Bul elektrobuslar waqıtsha qoyılǵan jónelisler bolıp, házirgi waqıtta hawa rayınıń keskin suwıtıwına baylanıslı jolawshılardı óz mánzillerine tez jetkeriw maqsetinde, házirshe hár jóneliske 4 elektrobus jolawshılarǵa xızmet kórsetpekte, – deydi Qaraqalpaqstan Respublikası Transport ministrliginiń baspasóz xatkeri Zahiyda Qaljanova. – Aldaǵı waqıtları da paytaxtımızda usınday zamanagóy elektrobuslardı kóbeytip, xalqımızdıń transport xızmetine degen talabın qanaatlandırıw maqsetinde, ministrligimiz tárepinen sırt el kompaniyaları menen sóylesiwler júrgizilip, bul baǵdarda jumıslar alıp barıla berile beredi.
Álbette, islenip atırǵan bunday iygilikli isler xalqımızdıń múshkilin jeńilletiw menen birge, kóshelerde avtotransportlardıń tıǵılısın azayıwına óziniń unamlı tásirin kórsetedi dep oylaymız.

Adilbay Orazov,
Qaraqalpaqstan xabar agentligi sholıwshısı