Ózbekstanda ilimiy laboratoriyalardıń jasalma intellektke tiykarlanǵan birden-bir ilimiy platforması iske qosıladı.
Innovaciyalıq rawajlanıw agentligi tárepinen islep shıǵılıp atırǵan bul joybar mámlekettegi barlıq ilimiy-izertlew infrastrukturaları haqqındaǵı maǵlıwmatlardı birden-bir oraylasqan málimleme resursı sıpatında jámlep, olardı nátiyjeli basqarıw imkaniyatın beredi.
Sonday-aq, ilim hám innovaciyalıq jumıs penen shuǵıllanıwshı shólkemlerde ilimiy infrastrukturalardan paydalanıw nátiyjeliligin prognozlaw hám optimallastırıwǵa baylanıslı tallawlar jasalma intellekt texnologiyaları arqalı ámelge asırıladı. Bul bolsa waqıt hám materiallıq resurslardı únemlewge xızmet etedi.
Atap ótiliwinshe, bul platforma tarawda ashıq-aydınlıqtı támiyinlew, sonday-aq, ilimiy shólkemler arasında birge islesiw baylanısların jáne de kúsheytiwge xızmet etedi. Qánigelerdiń pikirinshe, platforma ilimiy izleniwlerdiń sapasın arttırıw, qayta qárejetlerdi azaytıw jáne respublikanıń túrli aymaqlarında jumıs alıp barıp atırǵan ilimiy laboratoriyalar imkaniyatlarınan tolıq hám maqsetli paydalanıw imkaniyatın jaratadı.
Jasalma intellekt texnologiyaları tiykarında jaratılıp atırǵan bul platforma respublikada ilimniń sanlı keleshegin qáliplestiriw jolındaǵı áhmiyetli qádemlerden biri bolıwı kútilmekte.

N.Raxmanova,
ÓzA