Múddetli áskeriy xızmetkerlerdiń áskeriy xızmetti tamamlaǵannan soń jámiyette múnásip orın iyelewine, óz keleshegin anıq kásip-óner menen baylanıstırıwına járdemlesiw maqsetinde Nókis qalasında jaylasqan monoorayǵa ámeliy sapar shólkemlestirildi.
Bul sapar dawamında áskeriy xızmetkerler monoorayda jaratılǵan zamanagóy sharayatlar, oqıw xanaları, ámeliy shınıǵıwlar ushın mólsherlengen ustaxanalar hám kásip-ónerge oqıtıw baǵdarları menen jaqınnan tanıstı. Qánigeler tárepinen oraydıń jumısı, oqıw processleri, qısqa múddetli kurslar, zamanagóy kásipler hám miynet bazarında talap joqarı bolǵan baǵdarlar boyınsha tolıq túsinikler berildi.
Sonday-aq, múddetli áskeriy xızmetkerlerge málimleme texnologiyaları, tigiwshilik, kepserlew, avtomexanika, elektrotexnika, shashtárezlik hám basqa da kásipler boyınsha oqıw imkaniyatları, oqıw múddeti, juwmaǵında beriletuǵın mámleketlik úlgidegi sertifikatlar hám bántlik máseleleri boyınsha áhmiyetli maǵlıwmatlar jetkerildi.
Sapar dawamında áskeriy xızmetkerler ózlerin qızıqtırǵan sorawlarǵa hár tárepleme juwaplar alıp, jeke qızıǵıwshılıq hám qábiletlerinen kelip shıǵıp keleshek kásibin tańlaw boyınsha túsiniklerge iye boldı. Ayırım qatnasıwshılar monoorayda jumıs alıp barıp atırǵan oqıwshılardıń ámeliy jumısları úlken qızıǵıwshılıq penen baqladı.
Bul sapar múddetli áskeriy xızmetkerlerdiń kásipke baǵdarlanıwı, olardıń sociallıq beyimlesiwi hám keleshekte turaqlı bántligin támiyinlew jolındaǵı áhmiyetli qádemlerden biri bolıp, Jańa Ózbekstan jasları ushın jaratılıp atırǵan keń imkaniyatlardıń ayqın kórinisi boldı.

Qaraqalpaqstan xabar agentligi