Usı jıldıń 20-yanvarında qabıl etilgen “2026-2030-jıllarda qan menen islesiw xızmetin bunnan bılay da jetilistiriw ilajları haqqında”ǵı Prezident qararına bola qan menen islesiw xızmeti shólkemlerinde jańa sistema jolǵa qoyıladı.
Yaǵnıy, 2026-jıl 1-oktyabrden qan menen islesiw xızmeti shólkemlerinde qan ónimleriniń qáwipsizligi hám sapasın támiyinlew boyınsha barlıq texnikalıq hám medicinalıq processlerdi tártipke salıwshı standart operaciyalıq processler hám qáwipsizlik protokolları engiziledi.
“Talap – qayta islew – jetkerip beriw” shınjırı sheńberinde biznes processlerin basqarıw sisteması jolǵa qoyıladı.
2027-jıl 1-marttan “Qan ónimleriniń elektron esabın júrgiziw” málimleme sisteması engiziledi.
2026-jıl 1-oktyabrden qan menen islesiw xızmeti shólkemlerinde qan ónimlerin májbúriy tártipte 2 basqıshlı skrining tekseriwinen ótkeriw sisteması jolǵa qoyıladı.
Qararǵa bola, 2026-jıl 1-yanvardan biyǵárez qan donorlıǵı háreketin rawajlandırıw maqsetinde hár ayda “Birgelikte ómirdi saqlaymız” milliy donorlıq akciyası ótkeriledi. Usı akciya sheńberinde hár aydıń 1 háptesi dawamında – qan menen islesiw xızmeti shólkemlerinde, hár aydıń 3 háptesi dawamında – bilimlendiriw, emlew hám basqa da shólkemlerde qan donorlıǵı shólkemlestiriledi.
Ózbekstan Respublikası Qurallı Kúshleri sistemasına kiriwshi ministrlik, uyım hám huqıq qorǵaw uyımlarınıń áskeriy xızmetkerleri arasında hár jılı 1 márte donorlıq kúnleri ótkeriledi.
Miynet jámáátlerinde donorlıq kúnlerin ótkeriw jolǵa qoyıladı.
Ulıwma orta hám orta arnawlı, kásip-óner hám joqarı bilimlendiriw shólkemlerinde donorlıq boyınsha ruwxıy-aǵartıwshılıq ilajlar hám ushırasıwlar shólkemlestiriledi.
Sonday-aq, tuwıwda medicinalıq járdem kórsetetuǵın hár bir mákemede qan hám onıń quramlıq bólekleriniń qıstawlı rezervi shólkemlestiriliwi jáne onı qan hám onıń quramlıq bólekleri, sonıń ishinde, plazma hám eritrocitar massa rezervi menen támiyinleniwi belgilendi.

M.Qosimova,
ÓzA