Ózbekstan Respublikası Shańaraq hám hayal-qızlar komiteti, Bajıxana komiteti hám Sawda-sanaat palatası tárepinen usı jıldıń 20-22-yanvar kúnleri isbilermen hayal-qızlar ushın “Bajıxana isi” baǵdarı boyınsha aralıqtan turıp oqıw kursları shólkemlestirildi.
Bul 3 kúnlik oqıw kurslarına respublikamızdan 100 ge shamalas isbilermen hayal-qız qatnastı.
Oqıw kursları dawamında júk operaciyası processlerin sanlastırıw, wákillikli ekonomikalıq operatorlar ushın jaratıp berilgen ápiwayılastırıwlar, tovarlardı fizikalıq shaxslar tárepinen bajıxana shegarası arqalı alıp ótiwdiń tártip-qaǵıydaları, sırtqı ekonomikalıq jumıstı tarifsiz tártipke salıwdıń tiykarları, tovarlardı qayta islew perspektivaları, sonday-aq, bajıxana tólemlerin keshiktirip yaki bólip-bólip tólew imkaniyatların alıwdıń tártip-qaǵıydaları tuwralı keń túrde maǵlıwmatlar berildi.
Oqıw kursınıń úshinshi kúninde qatnasıwshılar Nókis sırtqı ekonomikalıq baylanıs bajıxana postına barıp, post jumısları menen tanıstırıldı. Oqıw dawamında alınǵan teoriyalıq bilimler ámeliy jaqtan kórsetip berildi.
– Oqıw dawamında isbilermenlikti rawajlandırıw, ásirese hayal-qızlar ushın óziniń isbilermenlik jumısın jolǵa qoyıw baǵdarında Prezidentimiz hám Húkimetimiz tárepinen qabıl etilgen qararlar hám pármanlar, normativlik-huqıqıy hújjetler tuwralı kóplegen maǵlıwmatlarǵa iye boldıq. Sonday-aq, hayal-qızlardıń basshılıǵında respublikamızda jumıs islep turǵan isbilermenlik subektleri haqqında da maǵlıwmatlar alıp, olar menen tájiriybe almasıw múmkinshiligine iye boldıq, – deydi isbilermen Nargúl Xudaybergenova.
Ilaj dawamında qatnasıwshılarǵa arnawlı sertifikatlar tapsırıldı.

Á.Jiyemuratov,
Qaraqalpaqstan xabar agentligi.