Tashkent qalasında Olimpiya qalashasında boks boyınsha eresekler arasında Ózbekstan chempionatı bolıp ótti.
Jarısqa mámleketimizdiń barlıq aymaqlarınan eń kúshli boksshiler qatnasıp, óz salmaq kategoriyaları boyınsha bellesiwlerge tústi hám chempionattıń ádil ótiwin támiyinlew maqsetinde, Ózbekstan boks federaciyası tárepinen Vengriya, Marokko, Meksika, Iordaniya, Mongoliya, Kosta-Rika, Gvatemala, Zimbabve mámleketinen tóreshiler qatnasıp, yarım final hám final bellesiwlerin basqarıp bardı.
Oǵada qızıqlı hám keskin ótken chempionatta respublikamız qızları da qatnasıp, bir neshe sıylı orınlardı iyelewge miyasar boldı. Atap aytqanda, 75kg salmaqta bellesiwlerge túsken Aysanem Sarwarova barlıq qarsılasların jeńip shıǵıp, Ózbekstan chempionatınıń altın medalın qolǵa kirgizdi.
Al, 57kg salmaqta ringge shıqqan Raxima Bekniyazova finalǵa shekem jetip keldi hám upaylar esabında ferǵanalı Xumorabonu Mamajonovaǵa jeńilip qaldı. 80kg da bellesken Aynura Begjanova bolsa, qola medal iyesine aylandı.
– Ózbekstan chempionatına 6 salmaq kategoriyası boyınsha 7 qız alıp barǵan edik, -deydi Aysanem Sarwarovanıń ustazı Batır Bawatdinov. – Sonnan 3 boksshimiz sıylı orınlardı iyeledi hám saylandı komanda quramı aǵzasına qabıllandı.
Tilekke qarsı, respublikamızdıń erler komandası aǵzalarına bul jarısta jeńimpazlıq nesip etpedi.
Jeńimpaz boksshilerimizdi jarısqa trenerlerden Batır Bawatdinov hám Raxat Óteniyazovlar tayarladı.

Adilbay Orazov,
Qaraqalpaqstan xabar agentligi sholıwshısı