Berdaq atındaǵı Qaraqalpaq mámleketlik universitetinde ilim hám bilimlendiriwdiń integraciyasın bekkemlew, jas izertlewshilerdi qollap-quwatlaw hám olardıń ilimiy potencialın jáne de arttırıwǵa qaratılǵan “Akademik hám jas ilimpazlar” atamasında ushırasıw bolıp ótti.
Onda Ózbekstan Ilimler akademiyası Qaraqalpaqstan bóliminiń baslıǵı, akademik A.Reymov, sonday-aq, universitettiń magistrantları, doktorantları hám belsendi jas ilimpazlar qatnastı.
Ushırasıwda búgingi kúnde joqarı oqıw ornında ilimiy-izertlew jumısların rawajlandırıw ushın barlıq zárúr sharayatlar jaratılıp atırǵanı atap ótildi.
Ózbekstan Respublikası Prezidentiniń 2025-jıl 27-dekabrdegi “Ózbekstan Respublikası Ilimler akademiyasınıń jumısın jetilistiriw ilajları haqqında”ǵı qararı tuwralı maǵlıwmatlar berildi.
Atap ótilgenindey, usı qararda mámlekette ilimdi rawajlandırıw, ilimiy-izertlewlerdi qollap-quwatlaw, jas ilimpazlardıń ilimiy jumısın xoshametlew, Ilimler akademiyası hám joqarı bilimlendiriw mákemeleri arasındaǵı birge islesiwdi bunnan bılay da kúsheytiw máselelerine ayrıqsha itibar qaratılǵan.
Akademiktiń atap ótiwinshe, bul qarar ilim tarawında túpkilikli burılıs jasaw, zamanagóy ilimiy mekteplerdi qáliplestiriw hám jas izertlewshiler ushın keń imkaniyatlar jaratıwda áhmiyetli huqıqıy tiykar bolıp xızmet etedi. Sonday-aq, ilimiy-izertlewlerdiń nátiyjelerin ámeliyatqa engiziw, innovaciyalıq ideyalardı qollap-quwatlaw búgingi kúnniń áhmiyetli wazıypalarınan biri bolıp esaplanadı.
Ushırasıw ashıq sáwbetlesiw tárizinde dawam etip, magistrantlar, doktorantlar hám jas ilimpazlar ózleriniń ilimiy jumısları, izertlew baǵdarları, mashqalaları hám perspektivalı rejeleri haqqında pikir alıstı.
Akademik jas izertlewshilerdiń sorawlarına hár tárepleme juwap berip, ilimiy jumıslardı sapalı alıp barıw, xalıqaralıq basılımlarda maqalalar basıp shıǵarıw, grant joybarlarında belsene qatnasıw boyınsha bahalı usınıslar berdi.

Á.Jiyemuratov,
Qaraqalpaqstan xabar agentligi