“Nókis” sırtqı ekonomikalıq jumıs bajıxana postı xızmetkerleri tárepinen sırtqı sawda júklerin bajıxana rásmiylestiriwinen ótkerip atırǵan isbilermenlik subektleri menen korrupciyaǵa qarsı gúresiw baǵdarında gezektegi sáwbetlesiw ótkerildi.
Atap ótilgenindey, xızmet lawazımınan jeke mápi ushın paydalanıw korrupciyanıń klassikalıq kórinisi esaplanadı. Mámleketlik xızmetlerden baslap, isbilermenlikke shekemgi túrli tarawlarda para alıwdıń keń tarqalǵanlıǵı, mámleketlik satıp alıwlardı, resurslardı bólistiriw hám qararlardı qabıl etiwde ashıq-aydınlıqtıń jeterli emesligi korrupciya ushın tiykar jaratadı.
“Insan faktorı”n minimallastırıw ushın sanlı qurallardı engiziw dawam ettirilmekte. Atap aytqanda, hár jılı korrupciyaǵa qarsı gúresiwdiń nátiyjeliligi boyınsha reyting járiyalanadı. Puqaralardıń Murojaat.gov.uz hám Eanticor.uz portalları arqalı elektron múrájatları keledi. Bul puqaralarǵa korrupciya haqqında xabar beriw hám olardıń múrájatların kórip shıǵıw procesin baqlaw imkaniyatın beredi.
Korrupciyaǵa qarsı gúresiw tek ǵana nızamshılıqtı hám institutlardı jetilistiriwdi emes, al jámiyetlik sananı ózgertiw, ashıq-aydınlıqtı arttırıw hám nızam ústinligin bekkemlewdi talap etetuǵın keń kólemli wazıypa bolıp esaplanadı.
Sáwbetlesiwlerde puqaralardıń bajıxana nızamshılıǵına qatań ámel etiwi, para usınıs etpewi, bajıxana xızmetkerleriniń dámegóylik yamasa lawazım wákilliginen paydalanbaqshı bolǵanı sıyaqlı jaǵdaylarǵa dus kelgende Bajıxana komitetiniń qısqa 11-08 hám Qaraqalpaqstan Respublikası Bajıxana basqarmasınıń (61) 224-90-86 isenim telefonlarına múrájat etiw múmkin ekenligi eskertildi.

Á.Jiyemuratov,
Qaraqalpaqstan xabar agentligi.