Hindstan milliy valyutası – rupiya keskin qádirsizleniwde dawam etpekte. “Bloomberg” basılımınıń jazıwınsha, keshe hind rupiyası Aziya finans bazarında tariyxıy eń tómen kórsetkishti atap ótti.
Atap ótiliwinshe, rupiya bir kún ishinde 0,8 procentke arzanlap, 1 AQSh dolları ushın 91,7450 dárejesine túsken. Qızıǵı sonda, áyne usı kúni kontinentimizdegi basqa da valyutalar – Qubla Koreya voni, Indoneziya rupiyası hám Filippin pesosı bekkemlengen.
Ekspertlerdiń pikirinshe, bul jaǵday Hindstandaǵı jaǵday ulıwma Aziya bazarlarınıń tendenciyası menen emes, al mámleket ishindegi mashqalalar menen baylanıslı ekenin kórsetpekte. Sonıń menen birge, investorlardıń rupiyaǵa bolǵan isenimi sezilerli dárejede tómenlegen.
Rupiyanıń qádirsizleniwiniń tiykarǵı sebebi – sırt el kapitalınıń Hindstannan tez pát penen shıǵıp ketiwi. Usı ay dawamında sırt el investorları hind fond bazarınan derlik 2,7 milliard dollar qarjını alıp shıqtı. Bul bolsa 2025-jıl dawamında alıp shıǵılǵan 19 milliard dollarlıq kapital fonında basımdı jáne de kúsheytti.
Sonday-aq, AQSh penen sawda qatnasıqlarındaǵı keskinlik te jaǵdaydı qıyınlastırmaqta. Járiyma bajıları Hindstan eksportına unamsız tásir kórsetip atırǵan bolsa, importqa bolǵan joqarı talap kompaniyalardı dollar rezervlerin jedel túrde toplawǵa iytermelemekte.

F.YaXShIBOEVA,
ÓzAnıń xabarshısı