Áskeriy xızmetkerler hám olardıń shańaraq aǵzaların sociallıq jaqtan qollap-quwatlaw, olardı qıynap kiyatırǵan mashqalalardı óz waqtında anıqlaw hám saplastırıw, sonday-aq, bos jumıs orınları menen tanıstırıw hám jumısqa jaylasıwında ámeliy járdem beriw maqsetinde Arqa-batıs áskeriy okruginde Nókis áskeriy prokuraturası tárepinen kóshpeli qabıllaw shólkemlestirildi.
Kóshpeli qabıllaw dawamında qatnasıwshılardıń sociallıq, huqıqıy hám ekonomikalıq baǵdardaǵı múrájatları tıńlandı. Sonıń ishinde, turaq jay máseleleri, bántlik, kredit hám materiallıq járdem, densawlıqtı saqlaw, perzentlerdiń bilim alıwı menen baylanıslı mashqalalar boyınsha múrájatlar hár tárepleme kórip shıǵıldı.
Ilajda áskeriy xızmetti ótep bolǵan yamasa xızmet jumısın alıp barıp atırǵan áskeriy xızmetkerlerdiń shańaraqları ushın aymaqtaǵı bos jumıs orınları haqqında maǵlıwmatlar berildi. Juwapker shólkemlerdiń wákilleri tárepinen jumısqa jaylasıw tártibi, zárúr hújjetler hám kásipke qayta tayarlaw imkaniyatları boyınsha túsinikler alıp barıldı.
Nókis áskeriy prokurorı tárepinen áskeriy xızmetkerlerdiń huqıqları menen nızamlı máplerin qorǵaw máselelerine ayrıqsha itibar qaratıldı. Nızambuzıwshılıq jaǵdaylarınıń aldın alıw, múrájatlar menen islesiwde ádillik hám ashıq-aydınlıqtı támiyinlew boyınsha juwapkerlerge tiyisli kórsetpeler berildi.
Ilajda bunday kóshpeli qabıllawlar áskeriy xızmetkerler menen tikkeley sóylesiwdi kúsheytiw, olardıń mashqalalarına ornında sheshim tabıw jáne sociallıq qorǵawdı bunnan bılay da bekkemlewde úlken áhmiyetke iye ekeni atap ótildi.
Juwmaǵında múrájatlardıń bir bólegi ornında sheshildi, qosımsha úyreniw talap etiletuǵın máseleler bolsa qadaǵalawǵa alınıp, orınlanıwı boyınsha juwapker uyımlarǵa jiberildi.

Qaraqalpaqstan xabar agentligi