Ózbekstanda jámiyetlik qáwipsizlikti támiyinlew hám huqıqbuzarlıqlardıń aldın alıw boyınsha áhmiyetli ilajlar ámelge asırılmaqta. Sonıń menen birge, Prezidentimizdiń “2025-jılı respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında”ǵı qararı sheńberinde Ózbekstanda bir qatar jańalıqlar engizildi.
“Máhálle jetiligi” sisteması kúsheytilip, huqıqbuzarlıqlardıń aldın alıwda máhálledegi jámiyetshilik wákilleri, nuranıylar hám máhálle belsendileri keńnen tartılmaqta. Sonday-aq, máhálleler, jámiyetlik orınlar hám turaq jaylarda qáwipsizlikti támiyinlew maqsetinde qáwipsizlik kameraları, avtomatlastırılǵan monitoring sistemaları hám elektron xabar beriw mexanizmleri keńnen engizilmekte.
Usı qarardıń orınlanıwı sheńberinde respublikamız kóleminde “Migraciyalıq profilaktika” aylıǵı járiyalandı. Aylıq sırt elde islep atırǵan hám islep qaytqan puqaralardıń sociallıq beyimlesiwi hám qáwipsizligin támiyinlewge qaratılǵan.
Aylıq sheńberinde Ellikqala rayonı IIB xızmetkerleri tárepinen sırt elge shıqqan hám qaytıp kelgen shaxslar menen filtr sorawlar ótkerilmekte. Birge islesiwshi shólkemler menen birgelikte olardıń bántligin támiyinlew, medicinalıq tekseriwden ótkeriw, sonday-aq, jat ideyalar hám unamsız tásirlerge túsip qalıwınıń aldın alıw maqsetinde mánzilli profilaktikalıq ilajlar ámelge asırılmaqta.

Qaraqalpaqstan xabar agentligi