Energetika hám neft-gaz tarawında xalıqaralıq birge islesiwdi keńeytiw, zamanagóy texnologiyalardı engiziw hám iri investiciyalıq joybarlardı ámelge asırıw mámleketimiz ekonomikası ushın úlken áhmiyetke iye bolmaqta.
Bul baǵdarda “Ózbekneftgaz” AJ tárepinen jetekshi sırt el kompaniyaları menen óz-ara paydalı birge islesiw baylanısların bekkemlewge ayrıqsha itibar qaratılmaqta.
Jámiyet basqarmasınıń baslıǵı Abduǵni Sanginovtıń “Air Products” kompaniyasınıń Evropa hám Afrika regionları boyınsha prezidenti Ivo Bols penen ótkergen sóylesiwi de usı maqsetlerge qaratıldı.
Dáslep tárepler óz-ara birge islesiwdiń házirgi jaǵdayı hám onı rawajlandırıw perspektivaları boyınsha pikir alıstı. Soń birgeliktegi joybarlardı ámelge asırıw procesi, sonday-aq, neft-gaz tarmaǵında birge islesiwdi jáne de keńeytiw imkaniyatları dodalandı. Ásirese, onda tábiyǵıy gazdi tereń qayta islew tarawında strategiyalıq sheriklikti rawajlandırıw máselelerine tiykarǵı áhmiyet qaratıldı.
Bunnan tısqarı, “Uzbekistan GTL” zavodınıń turaqlı hám úzliksiz jumısın támiyinlew, texnologiyalıq qollap-quwatlaw, óndiris úskeneleriniń isenimli islewi hám awısıq bóleklerdi óz waqtında jetkerip beriwge baylanıslı máseleler hár tárepleme kórip shıǵıldı.
Sóylesiw juwmaǵında tárepler gazdi qayta islew tarawındaǵı birge islesiwdi jáne de tereńlestiriw, sonday-aq, Ózbekstan neft-gaz tarmaǵında ámelge asırılıwı rejelestirilip atırǵan basqa da perspektivalı joybarlar boyınsha strategiyalıq birge islesiwdi keńeytiwge tayar ekenin atap ótti.

N.Ziyodullaeva, ÓzA