Oliy Majlis Nızamshılıq palatasınıń Innovaciyalıq rawajlanıw hám málimleme texnologiyaları máseleleri komiteti tárepinen komitettiń 2025-jılǵı jumısınıń juwmaqları hám usı jıldaǵı rejeleri boyınsha ǴXQ wákilleri ushın ashıq sáwbet hám press-tur shólkemlestirildi.
Málim etilgenindey, komitet ótken jıldaǵı jumısı dawamında 11 nızam joybarına juwapker bolǵan, olardan 9 ı qabıl etilip, Oliy Majlis Senatına jiberilgen. 2 ewi ekinshi oqıw dodalawına tayarlanıp atırǵanı aytıp ótildi.
Nızam dóretiwshiligi baǵdarında komitettiń bir topar deputatları tárepinen “Jasalma intellektti qollanıw arqalı júzege keletuǵın qatnasıqlardı tártipke salıw múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam joybarı islep shıǵılıp, Nızamshılıq palatası tárepinen qabıl etildi. Bul nızamǵa usı jıl 21-yanvar kúni Prezidentimiz tárepinen qol qoyıldı.
Bul hújjet jasalma intellekt texnologiyaların bunnan bılay da rawajlandırıw, jasalma intellekt texnologiyalarınan paydalanıwdıń ulıwma tiykarların belgilew hám usı tarawda júzege keletuǵın qatnasıqlarda puqaralardıń huqıqları menen erkinliklerin qorǵawǵa xızmet etedi.
Sonday-aq, korrupciyaǵa qarsı gúresiw baǵdarındaǵı wazıypalardan kelip shıǵıp, komitet tárepinen kiberkorrupciya baǵdarındaǵı qatnasıqlardı tártipke salıwda huqıqıy bazanı bekkemlew maqsetinde “Ózbekstan Respublikasınıń ayırım nızam hújjetlerine mámleketlik uyımlar jumısınıń sanlı ashıq-aydınlıǵın támiyinlewge qaratılǵan qosımshalar kirgiziw haqqında”ǵı nızam joybarı islep shıǵıldı.
Komitet keleshektegi jumısı dawamında mámleket basshısınıń Oliy Majlis hám Ózbekstan xalqına Múrájatında innovaciyalar hám málimleme texnologiyaları tarawında belgilengen áhmiyetli wazıypalardıń orınlanıwın támiyinlewge ayrıqsha itibar qaratıwdı rejelestirgen.
Sonıń ishinde, nızamshılıq processleriniń jedel hám sapalı bolıwı, parlamentlik qadaǵalawdıń nátiyjeliligin támiyinlew jáne puqaralardıń múrájatların tallawdıń aldınǵı usılların engiziw maqsetinde Nızamshılıq palatasınıń jumısına, nızam dóretiwshiligi procesine jasalma intellekt texnologiyaların engiziwdi maqset etken.
Sonday-aq, elektron xızmetlerden paydalanıwda puqaralarǵa qolaylıqlar jaratıw, olardıń qatnasın jáne de arttırıw, xalıqtıń barlıq qatlamları, sonıń ishinde, mayıplar, kekseler hám alıs aymaqlarda jasaytuǵın puqaralardıń sanlı imkaniyatlardan keńirek paydalanıwın támiyinlew maqsetinde “Sanlı húkimet haqqında”ǵı nızam joybarın islep shıǵıw názerde tutılǵan.

Muhtarama Komilova, ÓzA