“Rawajlanıw strategiyası” orayında “Xalıqtıń salamatlıǵın támiyinlew hám sociallıq qorǵaw sistemaların jetilistiriw: maqset hám wazıypalar” temasına baǵıshlanǵan baspasóz konferenciyası bolıp ótti.
“Rawajlanıw strategiyası” orayınıń direktorı Eldor Tulyakov “Ózbekstan – 2030” strategiyasın jetilistiriw, onda turaqlı ekonomikalıq ósiw, jańasha bilimlendiriw, medicina hám sociallıq qorǵaw sistemasın shólkemlestiriw, qolaylı ekologiyalıq sharayatlardı jaratıw máselelerinde sóz etti. Xalıq xızmetindegi ádil hám zamanagóy mámleketti qurıw hám basqa da kóplegen tiykarǵı baǵdarlar boyınsha jańa nátiyjelilik kórsetkishleri belgilep atırǵanı boyınsha maǵlıwmat berdi.
Sonday-aq, ilaj dawamında ministrlikler hám uyımlardıń wákilleri jetilistirilip atırǵan “Ózbekstan – 2030” strategiyası joybarındaǵı tiyisli baǵdarlar boyınsha wazıypalar hám kórsetkishler haqqında pikir bildirdi.
Densawlıqtı saqlaw ministriniń orınbasarı Elmira Basitxanova medicina tarawında jańa texnologiyalar hám qurallardı engiziw arqalı xalıqtıń salamatlıǵın tolıq támiyinlew boyınsha ámelge asırılıp atırǵan reformalar sheńberinde bul sistemada kelesi bes jıl ushın belgilep alınıp atırǵan ilajlar haqqında ayttı.
Sonıń ishinde, mámleketlik byudjetten densawlıqtı saqlaw tarawına ajıratılatuǵın qarjılardıń úlesin 2030-jılǵa shekem JIÓniń 5 procentine jetkeriw, qantlı diabet keselligi bar nawqaslardı emlew qamtıp alıwın 100 procent támiyinlew, respublikada gemodializ orınları menen nawqaslardı tolıq qamtıp alıw hám ortasha ómirsheńligin on úsh jıldan arttırıw, emlew mákemelerine poliklinikanıń elektron jollaması arqalı barǵan nawqaslardıń úlesin 70 procentke jetkeriw, barlıq qáwipli ósimteler anıqlanǵan nawqaslardı emlewdi 100 procent qamtıp alıw hám medicina tarawında 20 jasalma intellekt joybarın iske qosıw wazıypaların tallap berdi.
Sonıń menen birge, Sociallıq qorǵaw milliy agentligi basqarma baslıǵı Bekzod Rahmonov tarawda ámelge asırılıp atırǵan ilajlar, xalıqtıń sociallıq qorǵalıwın kúsheytiw baǵdarındaǵı jumıslar boyınsha maǵlıwmat berdi.
Atap ótilgenindey, jetilistirilip atırǵan “Ózbekstan – 2030” strategiyası joybarında ayrıqsha bilimlendiriw mútájligi bolǵan balalardıń inklyuziv bilimlendiriwge qamtıp alıw dárejesin 15 procentke arttırıw, málimleme-kommunikaciya texnologiyalarınan jedel paydalanıwǵa tartılǵan hayal-qızlardıń sanın hár jılı 100 mıńǵa (jámi 500 mıń) arttırıw sıyaqlı máselelerge toqtap ótildi. Sonday-aq, máhállelerde 3 840 hayal-qızlardıń bántligin támiyinlew hám salamatlıǵın bekkemlew orayların shólkemlestiriw sıyaqlı kórsetkishler haqqında túsindirip ótti.
Ilaj dawamında Shańaraq hám hayal-qızlar komiteti, Ózbekstan veteranların sociallıq qollap-quwatlaw “Nuraniy” qorınıń juwapkerleri de mámleketimizde hayal-qızlar hám kekselerdi sociallıq qollap-quwatlaw, olardıń huqıqları menen máplerin qorǵaw, turmıs sapasın arttırıwdıń áhmiyetine toqtap ótti.
Sonıń menen birge, sociallıq jaqtan hár tárepleme járdem kórsetiw baǵdarında alıp barılıp atırǵan sistemalı hám nátiyjeli jumıslar haqqında maǵlıwmat berildi. “Ózbekstan – 2030” strategiyası joybarında belgilenetuǵın mánzilli sociallıq xızmetler kórsetiw, medicinalıq hám psixologiyalıq járdem beriw, bántlikti támiyinlewge baylanıslı máselelerge toqtap ótildi.
Baspasóz ánjumanınıń juwmaǵında juwapkerler jurnalistlerdi qızıqtırǵan sorawlarǵa tolıq juwap berdi.

A.RUSTAMOV, ÓzA