Densawlıqtı saqlaw ministri Asılbek Xudayarov hám Ullı Britaniyanıń “International Hospitals Group” (IHG) kompaniyasınıń basshısı CHester King arasında ushırasıw bolıp ótti. Bul haqqında DSM baspasóz xızmeti málim etti.
Ministrlikte ótkerilgen sóylesiwde ruwxıy salamatlıq xızmeti baǵdarında “Xalıqaralıq standartlarǵa tiykarlanǵan ambulator hám stacionar emlew mákemesin shólkemlestiriw” joybarın ámelge asırıw, atap aytqanda, zamanagóy “aqıllı emlewxana” koncepciyası, sanlı basqarıw sistemaların engiziw, kadrlardıń mamanlıǵın arttırıw hám zamanagóy menedjment máseleleri dodalandı.
Atap ótilgenindey, “International Hospitals Group” Britaniyanıń jetekshi xalıqaralıq medicinalıq infrastruktura kompaniyası esaplanadı.
Ol dúnyada ruwxıy salamatlıq tarawında xalıqaralıq standartlarǵa tiykarlanǵan ambulator hám stacionar klinikalardı joybarlastırıw jáne qurıw baǵdarında úlken tájiriybege iye. Házirgi waqıtta Jaqın Shıǵıs mámleketleri, Qazaqstan hám jáne bir qatar mámleketlerde jedel jumıs alıp barmaqta.
Ushırasıwda kompaniya basshısı CHester King Tashkent qalası hám paytaxt wálayatında jaylasqan psixiatriya hám narkologiya xızmeti mákemelerine barǵanın atap ótip, Ózbekstanda ruwxıy salamatlıq baǵdarında ámelge asırılıp atırǵan jumıslardı unamlı bahaladı.
Dodalaw dawamında elimizde bul baǵdarda medicinalıq xızmetlerdiń sapasın xalıqaralıq standartlar dárejesine kóteriw, xalıq ushın zamanagóy hám nátiyjeli medicinalıq járdemdi támiyinlew jáne britaniyalı qánigelerdi tartqan halda ruwxıy salamatlıq xızmetin turaqlı rawajlandırıwǵa kelisip alındı.
Sonday-aq, kompaniya basshısı bul baǵdarda tek ǵana mámleketlik medicina mekemelerin emes, al mámleketlik emes medicina mákemeleri menen de birge islesiwge tayar ekenin málim etti.

Mohigul Qosimova, ÓzA