Ózbekstan Ekologiyalıq partiyası Qaraqalpaqstan Respublikası partiya shólkemi janındaǵı “Jas ekologlar” klubında keńeytilgen dógerek sáwbeti bolıp ótti.
Onda rayonlıq hám qalalıq “Jas ekologlar” klubınıń jetekshileri, Jaslar parlamentiniń aǵzaları hám belsendi jaslar qatnasıp, 2025-jıldıń juwmaqları hám 2026-jıl – “Máhállelerdi rawajlandırıw hám jámiyetti ilgeriletiw jılı” sheńberinde ámelge asırılatuǵın tiykarǵı wazıypalar dodalandı.
Ilajda 2025-jıl dawamında ámelge asırılǵan jumıslardıń nátiyjeleri haqqında maǵlıwmatlar berildi. Atap ótilgenindey, 2025-jıl dawamında 205 úgit-násiyat ilajı ótkerilip, oǵan 6658 jas qamtıp alındı. Sonday-aq, 114 dógerek sáwbetlesiwi, 50 ekologiyalıq akciya, 40 seminar shólkemlestirildi.
Sonday-aq, “Jasıl mákan” ulıwma milliy joybarı sheńberinde nál egiw akciyaları, “Eko kvest- Nókis-2025”, “Zakovat” intellektuallıq oyını, “Taza aymaq” akciyası, “Ekologiyalıq ádetler turmıstı ózgertedi” atamasında seminarlar hám “Eco Case Nukus” ekologiyalıq tańlawı keń jámiyetshiliktiń qatnasıwında ótkerilgeni atap ótildi.
Ilajda “Jas ekolog – máhálle elshisi”, “Jasıl máhálle”, “Taza aymaq” sıyaqlı baslamalardı sistemalı jolǵa qoyıw boyınsha pikir-usınıslar bildirilip, aldaǵı wazıypalar belgilep alındı.

Qaraqalpaqstan xabar agentligi