Bunnan 55 jıl burın milliy ádebiyatımızǵa «Qassaptıń túsi» dep atalǵan tuńǵısh satiralıq gúrrińi menen kirip kelgen jas talant iyesi Muratbay Nızanovtı búgin pútkil elimiz belgili jazıwshı, dramaturg hám kinoscenarist sıpatında jaqsı tanıydı hám húrmet etedi.
Ol dóretiwshilik jumısı dawamında 70 ten aslam kitaplar jazǵan bolıp, óz shıǵarmaları arqalı milliy ádebiyat hám mádeniyattıń rawajlanıwına salmaqlı úles qosıp kelmekte. Satira janrın tereńnen meńgerip alǵan jazıwshınıń «Usınday da boladı», «Kúlkim keledi», «Nıshana», «Sizge bolmaydı», «Adam kúldirgeni ushın», «Jat jurttaǵı jeti kún», «Írasın aytsań uradı», «Adam jamanlasań zeyniń ashıladı», «Eki qanxor», «Ǵáziyne», «Jaqında qızıq boladı», «Aqshagúl», «Aqıret uyqısı», «Dushpan», «Tutqın», «Ashıq bolmaǵan kim bar», «Eki úyrektiń toǵız bótekesi» sıyaqlı gúrrińler, povestler, romanları basılıp shıǵadı. Jazıwshınıń qáleminen dóretilgen satiralıq gúrrińlerinde kúndelikli turmısımızda jiyi ushırasatuǵın unamsız hám kúlkili hádiyseler qızıqlı súwretlenedi. Muratbay Nızanov poeziya janrında da qálemin sınap kórip, 2012-jılı «Sen hám men» atlı qosıqlar toplamın bastırıp shıǵardı.
1980-jıllardan baslap onıń dóretpeleri tuwısqan tillerde, atap aytqanda, ózbek, qazaq, tatar, noǵay tillerinde basılıp shıqtı.
«Eki dúnyanıń áweresi», «Ólimnen uyat kúshli» komediyaları menen «Ziywar» muzıkalı draması teatrlarımız saxnasında tamashagóylerge inam etildi.
Muratbay Nızanov 2003-2013-jıllarda qaraqalpaq kinosına basshılıq etip, 10 jıl ishinde 8 kórkem film, 10 balalar ushın yumorlıq jurnal, 4 animaciyalıq film hám bir qatar hújjetli filmler jarattı. Ózbekstan televideniesi arqalı berilgen yumorlıq videofilmleri hám teleminiatyuraları, «Ózbekstan» radiokanalı arqalı esittirilgen satiralıq gúrrińleri, jurnallarındaǵı miniatyuraları onı mámleketimiz boylap keń tanıttı.
«Ózbekfilm» hám «Qaraqalpaqfilm» kinostudiyaları tárepinen 2002-jılı kinoscenarist Muratbay Nızanov avtorlıǵında «Tanka» komediyası súwretke alındı hám ol ózbek tiline dublyaj islendi. Ol sońǵı jılları kinoscenarist-jazıwshı sıpatında «Tank», «Urı», «Kurort», «Qaysar», «Mehrigiya-márgiya», «Qorǵan», «Ziywar» hám «Ájiniyaz» sıyaqlı kinofilmleri menen keń jámiyetshilikke tanıldı. Bul filmler tamashagóylerdiń jaqsı kórip tamashalaytuǵın filmine aylandı.
Muratbay Nızanovtıń usınday pidayı xızmetleri respublika húkimeti tárepinen inabatqa alınıp, ol «Dwstlik» ordeni, «Qaraqalpaqstan xalıq jazıwshısı» hám «Ózbekstan Respublikasına xızmet kórsetken mádeniyat xızmetkeri» húrmetli ataqları menen sıylıqlandı.
Xalqımızdıń súyikli perzenti bolǵan ol bıyıl 75 jasqa tolıp, onıń yubileyi respublikamız boylap keń túrde belgilenbekte.
Ásirese, bul qutlı sáne jazıwshı tuwılıp kamalǵa kelgen Kegeyli rayonında saltanatlı jaǵdayda belgilendi.
Ádebiy-dóretiwshilik keshege rayon basshıları, belsendileri, jazıwshınıń dosları hám keń jámiyetshilik wákilleri qatnastı.
Ilajda Kegeyli rayonı hákimi Aybek Kamalov qatnasıp, yubiliyardı qızǵın qutlıqlap, jazıwshınıń aldaǵı dóretiwshiligine jańadan-jańa tabıslar tiledi hám rayon hákimliginiń estelik sawǵasın tapsırdı.
Sonday-aq, keshede shıǵıp sóylegenler Muratbay Nızanovtıń bay dóretiwshilik miyrası hám mazmunlı ómir jolı haqqında ózleriniń unamlı pikirlerin bildirdi.
Ótkerilgen saltanatlı ilajda Muratbay Nızanov shıǵıp sóylep, bunday saltanatlı kesheni shólkemlestirgeni ushın respublika húkimeti, Qaraqalpaqstan jazıwshılar awqamı hám rayon basshılarına úlken raxmet aytıp, ózi oqıǵan 1-sanlı ulıwma orta bilim beriw mektebine 10 tomnan ibarat kitapların sawǵa etti.
Ilaj rayonlıq mádeniyat bólimi xızmetkerleri tárepinen tayarlanǵan koncert baǵdarlaması menen qızıqlı dawam etti.

Adilbay Orazov,
Qaraqalpaqstan xabar agentligi sholıwshısı.