Mámleketlik qáwipsizlik xızmeti Shegara áskerlerine qaraslı Qaraqalpaqstan Respublikası hám Xorezm wálayatında jaylasqan áskeriy bólimlerde óz xızmetin alıp barıp atırǵan áskeriy xızmetkerler arasında “Ámir Temur izbasarları” tańlawınıń ekinshi basqıshı bolıp ótti.
Dáslepki basqısh bilim sınaqları bolıp, onda “Temur túzikleri”, Ámir Temurdıń ómiri boyınsha test sorawları hám awızeki soraw-juwaplar boldı. Keyingi shártte áskerler Ámir Temur haqqında maǵlıwmatlar beriwshi bayanat jasadı. Onda áskeriy xızmetker óz pikirin anıq, qısqa hám tásirsheń jetkeriwi kerek boldı. Bul basqıshta qatnasıwshılardıń tallaw qábileti, adamlardı izinen erte alıw sheberligi bahalandı. Úshinshi shárt shaqqanlıq hám anıqlıq sınaqları bolıp, bul shártte oq jaydan oq atıw, pıshaq ılaqtırıw boyınsha óz-ara bellesti. Tórtinshi shárt at sportı.
– Mine búgin Sahıpqıran Ámir Temurdıń tuwılǵan kúni múnásibeti menen áskeriy xızmetkerler arasında sport hám intellektuallıq bilimler boyınsha “Ámir Temur izbasarları” tańlawı bolıp ótti. Tańlawda áskerler ózleriniń intellektuallıq bilimleri hám sport kónlikpeleri menen bir qatar shártler boyınsha bellesti. Tańlaw qızǵın pikir-talaslarǵa bay bolıp ótti, – deydi tańlawda qatnasqan áskeriy xızmetker O.Shukurov.
Tańlaw juwmaqlanıp, sıylı birinshi orındı iyelegen jeńimpaz jarıstıń Ózbekstan Respublikalıq basqıshına jollamanı qolǵa kirgizdi.

Á.Jiyemuratov,
Qaraqalpaqstan xabar agentligi.