“Ózbekstan – 2030” strategiyasın jetilistiriwden maqset onı xalıqshıl strategiyaǵa aylandırıw bolıp tabıladı. Sonlıqtan onıń joybarı regulation.gov.uz hám uzbekistan2030.uz veb-saytlarında jámiyetshiliktiń dodalawına qoyıldı.
Mámleketimiz keleshegin belgileytuǵın bul hújjetke házirgi waqıtqa shekem watanlaslarımızdan 3 mıńǵa shamalas pikir hám usınıslar kelip tústi. Olar Ózbekstan Respublikası Prezidenti janındaǵı Strategiyalıq rawajlanıw hám reformalar agentligi, “Rawajlanıw strategiyası” orayı hám basqa da analitikalıq strukturalar tárepinen turaqlı úyrenip barılmaqta. Mámleketimiz basshısınıń xalıq penen pikirlesiw siyasatına muwapıq, joybar boyınsha usınıs jollaǵan puqaralar menen dógerek sáwbetleri shólkemlestirilmekte.
Gezektegi usınday ilaj Strategiyada orın alǵan ekonomikalıq-sociallıq nátiyjelilik kórsetkishleri boyınsha ótkerildi. Usınıs jollaǵan puqaralar mámleketlik uyımlardıń wákilleri menen tikkeley sóylesip, óz usınıslarınıń mazmunın erkin bildirdi. Aymaqlarda jasaytuǵın puqaralardıń pikirleri videobaylanıs arqalı tıńlandı.
Strategiyalıq rawajlanıw hám reformalar agentligi direktorınıń birinshi orınbasarı A.Abdukadirov, “Rawajlanıw strategiyası” orayınıń atqarıwshı direktorı E.Tulyakov hám ekonomikalıq izertlew oraylarınıń ekspertleri usınıslardı óz-ara dodalap, qızǵın pikir alıstı.
Sonıń ishinde, ekonomika, isbilermenlik, eksport, awıl hám suw xojalıǵı, joqarı bilimlendiriw, xalıqtıń bántligi máseleleri dıqqat orayında boldı.
Xalıqtıń tiykarlanǵan usınısları “Ózbekstan – 2030” strategiyasınıń nátiyjelilik kórsetkishlerin anıqlastırıw hám tolıqtırıwda inabatqa alınıwı atap ótildi.
Jámiyetlik dodalaw dawam etpekte. Onda belsene qatnasıń, Strategiya joybarına usınıslarıńızdı jiberiń.

ÓzA