Diyqan hám fermer xojalıqlarınıń nátiyjeli jumıs alıp barıwı ushın turaqlı túrde tiyisli qánigelerdiń qatnasıwında ótkerilip atırǵan oqıw-seminarları, kórgizbeler awıl xojalıǵı hám sharwashılıq tarawındaǵı reformalardı tereńlestiriw jáne fermer xojalıqlarınıń básekige shıdamlılıǵın arttırıwda ayrıqsha áhmiyetke iye bolmaqta.
Ózbekstan Respublikası Prezidentiniń 2025-jıl 3-noyabrdegi arnawlı qararınıń orınlanıwın támiyinlew maqsetinde usı jıl 20-21-yanvar kúnleri Qaraqalpaqstan awıl xojalıǵı hám agrotexnologiyalar institutında “Awıl xojalıǵı hám sharwashılıq tarawında zamanagóy agrotexnologiyalardı qollanıw, veterinariya xızmetlerinen paydalanıwdıń áhmiyeti hám ekonomikalıq nátiyjesi” atamasında fermer xojalıqları basshıları hám qánigeleri ushın gezektegi oqıw-seminarı shólkemlestirildi.
Bul oqıw-seminar fermer xojalıqlarınıń bilim hám kónlikpelerin arttırıw, awıl xojalıǵı óndirisine aldınǵı agrotexnologiyalardı keńnen engiziw, sharwashılıqta veterinariya xızmetlerinen nátiyjeli paydalanıw hám óndiris nátiyjeliligin arttırıwǵa qaratıldı.
Seminardıń birinshi kúninde Taqıyatas, Xojeli, Shomanay, Qanlıkól, Qońırat, Moynaq, Kegeyli, Bozataw, Shımbay, Qaraózek, Taxtakópir hám Nókis rayonlarındaǵı fermer xojalıqlarınıń, al, ekinshi kúni Tórtkúl, Beruniy, Ellikqala hám Ámiwdárya rayonları fermer xojalıqlarınıń wákilleri qatnastı.
Oqıw-seminarda Qaraqalpaqstan Respublikası Joqarǵı Keńesiniń komitet baslıǵı A.Jumanazarov, rayon hákimleriniń awıl hám suw xojalıǵı máseleleri boyınsha orınbasarları basshılıǵında ótkerilip, onda qatnasıwshılarǵa awıl xojalıǵı eginlerin jetistiriwde zamanagóy agrotexnologiyalardı qollanıw, resurslardı únemleytuǵın suwǵarıw usılları, sharwashılıqta nátiyjeli basqarıw, veterinariya xızmetlerinen paydalanıwdıń ekonomikalıq áhmiyeti, keselliklerdiń aldın alıw hám ónimdarlıqtı arttırıw máseleleri boyınsha tolıq túsinikler berildi.
Atap ótilgenindey, aldıńǵı tájiriybelerdi ámeliyatqa engiziw arqalı awıl xojalıǵı ónimleriniń kólemi hám sapası artadı, fermer xojalıqlarınıń ekonomikalıq turaqlılıǵı bekkemlenedi.
Seminarda taraw qánigeleri tárepinen pikir-usınıslar bildirilip, fermerler ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.