Berdaq atındaǵı Qaraqalpaq mámleketlik universitetinde Ózbekstan Respublikası Prezidentiniń 2025-jıl 5-maydaǵı “Bilimlendiriwdiń sapasın támiyinlew hám bilimlendiriw xızmetlerin kórsetiw sistemasın jetilistiriw boyınsha qosımsha ilajlar haqqında”ǵı Pármanınıń orınlanıwın támiyinlew maqsetinde, professor-oqıtıwshılar hám studentler arasında ulıwmamilliy sorawnaması shólkemlestirildi.
Bul sorawnama studentlerdiń bilimlendiriw procesiniń sapası, oqıtıw metodikası, professor-oqıtıwshılardıń kásiplik potencialı, oqıw-metodikalıq támiyinleniwi, sanlı bilimlendiriw resurslarınan paydalanıw dárejesi, bahalaw sisteması, sonday-aq, universitette jaratılǵan sharayatlar boyınsha pikir hám usınısların úyreniwge qaratıldı. Sorawnama procesi ashıq-aydınlıq hám qalıslıq principleri tiykarında shólkemlestirilip, onda universitettiń barlıq fakultet hám baǵdarlarında bilim alıp atırǵan studentler belsene qatnastı. Atap aytqanda, student-jaslar hám professor oqıtıwshılar ózleriniń pikirlerin erkin bildirip, bilimlendiriwdiń sapasın bunnan bılay da arttırıw boyınsha áhmiyetli usınısların ortaǵa tasladı.
– Sorawnama nátiyjeleri bilimlendiriw procesin studentlerdiń mútájlikleri hám zamanagóy miynet bazarı talaplarına beyimlestiriw, oqıw rejeleri hám pán baǵdarlamaların jetilistiriw, professor-oqıtıwshılardıń jumısın bunnan bılay da rawajlandırıw hám bilimlendiriw xızmetleriniń sapasın arttırıwda áhmiyetli derek bolıp xızmet etedi, – deydi Nókis mámleketlik texnika universiteti bilimlendiriw sapasın támiyinlew bóliminiń baslıǵı, docent Aymurza Allambergenov. – Atap ótiw orınlı, ulıwmamilliy sorawnama bilimlendiriw sistemasında studenttiń pikirin tiykarǵı áhmiyetke iye norma sıpatında tán alıw, olardıń bilimlendiriw procesindegi qatnasın kúsheytiw hám joqarı oqıw orınlarınıń jumısın turaqlı túrde jetilistirip barıwǵa xızmet etedi.
Bunday sorawnamalar respublikamızdaǵı Berdaq atındaǵı Qaraqalpaq mámleketlik universitetinen tısqarı, Ájiniyaz atındaǵı NMPI, Qaraqalpaqstan medicina institutı, Nókis mámleketlik texnika universiteti, Ózbekstan mámleketlik kórkem óner hám mádeniyat institutı Nókis filialı hám Innovaciyalıq texnologiyalar universitetlerinde ótkeriledi.

Adilbay Orazov,
Qaraqalpaqstan xabar agentligi sholıwshısı