2025-jıldıń juwmaqlarına bola, Qıtay hám Oraylıq Aziya mámleketleri arasındaǵı tovar almasıw kólemi 106,3 milliard dollarǵa jetti. Bul kórsetkish ótken jılǵa salıstırǵanda 12 procentke ósken.
Bul haqqında Qıtay Xalıq Respublikası Sawda ministrligi málim etti.
Ministrliktiń bildiriwine bola, tariyxta birinshi márte Qıtay hám Oraylıq Aziya arasındaǵı óz-ara sawda kólemi 100 milliard dollardan arttı. Sonıń menen birge, tovar almasıw sońǵı bes jıl dawamında turaqlı ósiw pátlerin kórsetpekte.
Atap ótiliwinshe, ótken jılı Qıtay Oraylıq Aziya mámleketleri ushın eń iri sawda sherigine aylanǵan. Qıtaydıń region mámleketlerine eksportı 71,2 milliard dollarǵa jetti hám bul jıllıq esapta 11 procentke ósti. Eksport kóleminiń artıwı tiykarınan elektromexanikalıq ónimler hám joqarı texnologiyalı tovarlar jetkerip beriwdiń kóbeyiwi menen baylanıslı.
Oraylıq Aziya mámleketlerinen Qıtayǵa import kólemi bolsa 35,1 milliard dollardı qurap, ótken jılǵa salıstırǵanda 14 procentke arttı.
Sonday-aq, Qıtay hám Oraylıq Aziya arasındaǵı transshegaralıq elektron kommerciya jedel rawajlanıp barmaqta. Logistika hám qoymaxana infrastrukturasın keńeytiw, sonday-aq, transshegaralıq tólemler tarawındaǵı birge islesiwdi tereńlestiriw jumısları dawam etpekte.
Bul processlerde Ózbekstan da áhmiyetli orın iyeleydi. Keyingi jılları Ózbekstan hám Qıtay arasındaǵı sawda-ekonomikalıq baylanıslar jedel rawajlanıp, sanaat kooperaciyası, transport-logistika, awıl xojalıǵı hám sanlı ekonomika tarawlarında bir qatar qospa joybarlar ámelge asırılmaqta. Bul bolsa Ózbekstannıń regionallıq sawda sistemasındaǵı rolin jáne de bekkemlemekte.
“Bir mákan, bir jol” baslaması sheńberindegi birge islesiw izbe-iz rawajlanıp, óz-ara baylanıslılıqtı kúsheytiw, úskeneler islep shıǵarıw, ekologiyalıq taza resurslar hám zamanagóy awıl xojalıǵı tarawlarında iri joybarlardı ámelge asırıwǵa xızmet etpekte. Bul bolsa region mámleketleriniń sanaattı modernizaciyalaw hám ekonomikalıq ósiwin qollap-quwatlamaqta.
Qıtay Sawda ministrligi keleshekte sawda strukturasın optimallastırıw, jańa biznes túrlerin rawajlandırıw hám joqarı dárejedegi institucionallıq birge islesiw mexanizmlerin jaratıwǵa járdemlesiwdi dawam ettiretuǵının málim etken.

Nilufar BOZOROVA, ÓzAnıń xabarshısı