Elimizde tálim-tárbiya sistemasın túpkilikli rawajlandırıwǵa, jas áwladtı potenciallı etip tárbiyalawǵa, balalardı mektepke shekemgi bilimlendiriw mákemelerine keńnen tartıwǵa ayrıqsha itibar qaratılıp kelinbekte.
Keyingi 7-8 jıl dawamında bul baǵdarda áhmiyetli nátiyjelerge erisilmekte. Atap aytqanda, mektepke shekemgi bilimlendiriw tarawında tórt mıńǵa shamalas mámleketlik baqsha imaratları rekonstrukciyalandı hám jańadan qurıldı. Mektepke shekemgi bilimlendiriw menen qamtıp alıw dárejesi 27 procentten 77 procentke arttı.
Sistemada jeke menshik sektordıń úlesin arttırıw baǵdarında ámelge asırılıp atırǵan háreketlerdiń nátiyjesinde mámleketlik emes baqshalardıń sanı 8 esege kóbeydi. Balalar baqshalarında tálim-tárbiyanıń sapasın hám nátiyjeliligin arttırıw ilajları izbe-izlik penen ámelge asırılmaqta.
Usı jerde jetilistirilip atırǵan “Ózbekstan – 2030” strategiyası joybarında da 2030-jılǵa shekemgi múddette mektepke shekemgi bilimlendiriw sistemasına baylanıslı bir qatar tiykarǵı maqset-wazıypalar belgilengenin aytıw kerek.
Sonıń ishinde, balalardı mektepke shekemgi bilimlendiriw menen qamtıp alıw dárejesin 2026-jılı 78 procent, 2027-jılı 78,5 procent, 2028-jılı 79 procent, 2029-jılı 79,5 procent, 2030-jılı bolsa 80 procentke jetkeriw rejesi qoyılǵan.
Sonday-aq, 2030-jılǵa shekem balalardı mektepke tayarlaw toparları menen 100 procent qamtıp alıw názerde tutılmaqta. Itibarlı tárepi, bul maqsetler ushın Mámleketlik byudjet, xalıqaralıq finans institutları, jeke menshik sektor, qáwenderlik hám grant qarjıların tartıw belgilengen.
Usı kúnlerde jáne de bayıtılıp atırǵan strategiya joybarında óz kórinisin tawıp atırǵan bul maqset-wazıypalar ósip kiyatırǵan jas áwlad wákilleri ushın jáne de qolaylı sharayatlar jaratıw, olardı zamanagóy tálim-tárbiya procesi menen qamtıp alıwda úlken áhmiyetke iye.
Esletip ótemiz, 2026-2030-jıllarǵa mólsherlengen “Ózbekstan – 2030” strategiyası joybarınıń jámietlik dodalawı dawam etpekte.

Muhtarama Komilova,
ÓzA