Ózbekstan Respublikası delegaciyası tárepinen keń kólemli strategiyalıq sheriklikti bunnan bılay da bekkemlew máselesinde Túrkiya Respublikasına jumıs saparı ámelge asırıldı.
Onda Ózbekstan Respublikası Sırtqı isler ministrligi basshılıǵında mámleketimiz huqıq qorǵaw uyımlarınıń basshılarınan ibarat delegaciya qatnastı.
Sapar etiw sheńberinde Ózbekstan Respublikası delegaciyasın Túrkiya Respublikası Prezidenti Rejep Tayyip Erdoǵan qabıl etti.
Ózbekstan hám Túrkiya sırtqı isler, ishki isler hám qorǵanıw ministrleri jáne qáwipsizlik xızmetleri basshılarınıń qatnasıwında “4+4” mexanizmi sheńberinde ushırasıw ótkerildi.
Eki tárepleme qatnasıqlardıń eń áhmiyetli temaları, regionallıq máseleler hám globallıq processler, sonday-aq, turaqlı rawajlanıw hám abadanlıqtı bekkem qáwipsizlik tiykarında támiyinlewge qaratılǵan eń nátiyjeli birge islesiw jolları dodalandı.
Sapar etiw sheńberinde Ózbekstan ishki isler ministri, general-leytenant Aziz Tashpwlatov hám Túrkiya Respublikası Ishki isler ministri mırza Ali Erlikaya arasında eki tárepleme ushırasıw shólkemlestirildi.
Tárepler transmilliy jınayatlarǵa qarsı gúresiw, jámiyetlik qáwipsizlikti támiyinlew, jedel hám nátiyjeli málimleme almasıw, migraciya máseleleri, aldınǵı tájiriybe hám zamanagóy usıllardı engiziw baǵdarındaǵı birge islesiw sezilerli dárejede jedelleskenin ayrıqsha atap ótti. Sonday-aq, ishki isler uyımları xızmetkerleriniń kásiplik potencialın arttırıw, qayta tayarlaw hám mamanlıǵın arttırıw máselelerinde sistemalı birge islesiw jolǵa qoyılǵanı atap ótildi.
Kiberjınayatshılıqqa qarsı gúresiw máseleleri keńnen dodalandı. Tárepler sanlı qáwip-qáterlerge qarsı nátiyjeli ilajlar kóriw, kiberjınayatlardı ashıwda aldınǵı texnologiyalardan paydalanıw, sanlı kriminalistika baǵdarında arnawlı oqıw kursların shólkemlestiriw hám bul tarawda turaqlı tájiriybe almasıp barıw áhmiyetli ekeni atap ótildi.
Sonıń menen birge, terrorizm hám ekstremizm, nızamsız migraciya, adam sawdası, náshebentlik zatlardıń nızamsız aylanısı sıyaqlı xalıqaralıq kólemdegi jınayatlarǵa qarsı gúresiw boyınsha birge islesiwdi jáne de kúsheytiw máseleleri de dodalaw orayında boldı.
Ózbekstan Ishki isler ministrligi quramında jańadan shólkemlestirilgen Kriminologiya izertlew institutı menen Túrkiya Respublikası Ishki isler ministrligi hám Jandarmeriyası janındaǵı ilimiy-izertlew orayları arasında birge islesiw baylanısların jolǵa qoyıwǵa ayrıqsha itibar qaratıldı.
Ushırasıw juwmaǵında migraciya processlerin tártipke salıw, puqaralardıń óz mámleketlerine qaytıwına járdemlesiw hám bul baǵdarda óz-ara muwapıqlastırılǵan ilajlardı ámelge asırıw haqqında Túsinisiw memorandumına qol qoyıldı.
Doslıq, ashıq hám konstruktivlik ruwxta ótken bul sapar etiw Ózbekstan hám Túrkiya arasındaǵı birge islesiwdi sapa jaǵınan jańa basqıshqa alıp shıǵıw, ishki isler uyımları arasında óz-ara isenimdi bekkemlew jáne qáwipsizlik tarawındaǵı birgeliktegi háreketlerdi jáne de nátiyjeli shólkemlestiriwge xızmet etedi.

N.Abduraimova,
ÓzA