Sociallıq qorǵaw milliy agentligi basshılıǵı Qıtay Xalıq Respublikasına xızmet saparı sheńberinde Qıtay Mayıplar federaciyasınıń baslıǵı CHen Kay menen ushırasıw ótkerdi.
Agentlik baspasóz xızmetiniń xabarında atap ótiliwinshe, ushırasıwda 2024-jıldıń may hám iyul aylarında ámelge asırılǵan óz-ara saparlar, qol qoyılǵan túsinisiw memorandumı, sonday-aq, házirgi waqıtta islep shıǵılıp atırǵan birge islesiw boyınsha “Jol kartası” joybarınıń áhmiyeti ayrıqsha atap ótildi.
Sóylesiw dawamında mayıplıǵı bolǵan shaxslardıń huqıqların támiyinlew tarawında tájiriybe almasıw máseleleri dodalandı. Sonıń ishinde, Mayıplardıń huqıqları haqqındaǵı Konvenciyanı ámeliyatqa engiziw, Federaciyanıń hár qıylı baǵdarlarda járdem kórsetiwshi birden-bir muwapıqlastırıwshı uyım sıpatındaǵı jumısın tereń úyreniw hám bul tájiriybeni Ózbekstanda qollanıw imkaniyatları kórip shıǵıldı.
Sonday-aq, mayıplıǵı bolǵan shaxslardı belsendi turmısqa tartıw, olardı jámiyetke tolıq integraciyalawǵa qaratılǵan baǵdarlamalardı ámelge asırıw, “inklyuziv ortalıq” principlerin qáliplestiriw hám keńnen engiziw máseleleri dodalaw orayında boldı. Birge islesiwdi aymaqlararalıq dárejege alıp shıǵıw, hár bir aymaqtıń ózine tán talap hám imkaniyatların esapqa alǵan halda birgeliktegi joybarlardı ámelge asırıw áhmietli ekenligi atap ótildi.
Sonıń menen birge, xalıq ushın járdemshi (assistiv) qurılmalardı islep shıǵarıw, paraolimpiada hám adaptiv sport tarawlarında birgeliktegi ilajlar ótkeriw boyınsha kelisimge erisildi.

Javohir Toshxwjaev,
ÓzA