Házirgi waqıtta Sociallıq qorǵaw milliy agentligi qánigeleri xızmet saparı menen Qıtay Xalıq Respublikasında bolıp tur. Bul sapar etiw sheńberinde Agentlik delegaciyası “New Frontier Group” kompaniyasınıń bas direktorı hám birgeliktegi shólkemlestiriwshisi Karl U menen ushırasıw ótkerdi.
“New Frontier Group” Qıtaydaǵı eń iri integraciyalasqan densawlıqtı saqlaw hám reabilitaciya sistemalarınan biri bolıp, insannıń pútkil ómir ciklı dawamında xızmet kórsetetuǵının atap ótiw kerek.
Sóylesiw procesinde reabilitaciya orayların nátiyjeli basqarıw ushın zamanagóy basqarıw modellerin engiziw, medicinalıq-sociallıq reabilitaciya standartların islep shıǵıwda xalıqaralıq ekspertlerdi tartıw, úyde xızmet kórsetiw ámeliyatınıń nátiyjeliligi, sonıń ishinde, qayta gospitalizaciyalardı qısqartıw hám xızmetlerdiń bahasın azaytıw arqalı xalıq ushın xızmetlerden paydalanıw imkaniyatın keńeytiw máseleleri dodalandı.
Maǵlıwmat ornında atap ótiw kerek, “New Frontier Group” kompaniyası quramına 11 xalıqaralıq kóp tarmaqlı hám qánigelesken emlewxana, 5 integraciyalasqan onkologiya orayı, 27 emlewxana hám medicina orayı, 22 reabilitaciya emlewxanası, 7 balalar reabilitaciya orayı kiredi. Bul tarmaq 40 tan aslam qalanı qamtıp alǵan bolıp, 77 mıńǵa shamalas nawqasqa úyde kútim xızmetleri kórsetilmekte.
Sonday-aq, Agentlik delegaciyası tárepinen United Family Healthcare (UFH) mákemesine sapar ámelge asırılıp, reabilitaciya xızmetlerin kórsetiw boyınsha ámeliy tájiriybe, ásirese palliativ xızmetler baǵdarındaǵı jumıslar úyrenildi.
Tárepler mayıplıǵı bolǵan shaxslar hám turaqlı kútimge mútáj xalıq ushın reabilitaciya xızmetleri sistemasın jetilistiriwge qaratılǵan tallaw hám kompleksli izertlew ótkeriw boyınsha kelisimge eristi.

Muhayyo Toshqoraeva,ÓzA