Taxtakópir rayonı hákimliginiń májilisler zalında Hindstan mámleketinen kelgen tájiriybeli pedagog Shayx Salman Alidiń qatnasıwında bilimlendiriwdiń sapasın arttırıw hám xalıqaralıq tájiriybeni ǵalaba en jaydırıwǵa qaratılǵan seminar shólkemlestirildi.
Onda rayon hákimligi wákilleri, mektep direktorları, inglis tili muǵallimleri, tiyisli mákeme hám shólkemlerdiń basshıları qatnastı.
Seminar dawamında sırt elli qánigeler menen birgelikte bilimlendiriw procesin shólkemlestiriw, inglis tilin oqıtıwda zamanagóy metodlardı qollanıw, oqıwshılardıń awızeki sóylew kónlikpelerin rawajlandırıw máseleleri dodalandı. Sonday-aq, qatnasıwshılarǵa xalıqaralıq tájiriybege tiykarlanǵan ámeliy usınıslar berildi.
– Sırt el qánigelerin ulıwma orta bilim beriw mekteplerine tartıwdan tiykarǵı maqset – oqıwshılardıń sóylew kónlikpelerin rawajlandırıw, inglis tilinde tábiyǵıy ortalıq jaratıw hám jaslarımızdıń dúnyanıń jetekshi joqarı bilimlendiriw mákemelerinde bilim alıw imkaniyatların keńeytiwden ibarat, – deydi orınbasarı Taxtakópir rayonı hákiminiń orınbasarı Shınıbek Bekturǵanov.
Ótkerilgen seminarda qatnasıwshılar tárepinen bayanatshıǵa sorawlar berilip, olarǵa tiyisli juwaplar aldı.

Adilbay Orazov,
Qaraqalpaqstan xabar agentligi sholıwshısı