Prokuratura uyımlarında ruwxıy-aǵartıwshılıq jumıslardıń úzliksiz alıp barılıwın támiyinlew, prokuratura xızmetkerleriniń ruwxıy intellektuallıq potencialın arttırıw, jaslardı watansúyiwshilik ruwxında tárbiyalaw maqsetinde Qaraqalpaqstan Respublikası prokuraturası tariyxı muzeyi jańadan shólkemlestirildi.
Búgin, Qaraqalpaqstan Respublikası prokurorı Sh.Aminov, veteranlar, keń jámiyetshilik, Respublika prokuraturası xızmetkerleri, rayon (qala) hám olarǵa teńlestirilgen prokurorlar qatnasıwında muzey paydalanıwǵa tapsırıldı.
Muzey innovaciyalıq texnologiyalar tiykarında keńeytilip, biybaha eksponatlar menen bayıtılǵan, sonıń ishinde, repressiyaǵa ushıraǵan prokuratura xızmetkerleriniń ómiri hám jumısın sáwlelendiriwshi súwretler hám eksponatlar, Qaraqalpaqstan Respublikası prokuraturası hám barlıq aymaqlıq prokuraturalardıń tariyxı hám jumısına baylanıslı súwretlerdiń elektron platforması, prokuratura uyımlarınıń qáliplesiw tariyxın sáwlelendirip beretuǵın videorolik usılardıń qatarına kiredi.
Ásirese, Qaraqalpaqstannıń keshegi hám búgini, baylıqları hám siyasiy maydandaǵı ornı, Jańa Ózbekstanda jańalanıp atırǵan el tımsalları súwretlengen diywal barelefi hámmede birdey qızıǵıwshılıq oyattı.
Sonıń menen birge, ilaj dawamında 4 mıńǵa shamalas ádebiyatlardı óz ishine alǵan, watansúyiwshilik hám ádillikti úgit-násiyatlawshı ullı shayır hám oyshıllardıń shıǵarmaları menen bezelgen kitapxana da usı kúni paydalanıwǵa tapsırıldı.

Qaraqalpaqstan xabar agentligi