Jáhán banki qatnasıwında ámelge asırılıp atırǵan «Ekonomikalıq ósiw ushın mektep bilimlendiriwin transformaciyalaw» joybarı sheńberinde 17-20-yanvar kúnleri Jáhán banki wákilleri hám Ózbekstan Respublikası Mektepke shekemgi hám mektep bilimlendiriw ministrliginiń juwapker xızmetkerleri Qaraqalpaqstan Respublikasında xızmet saparında boldı.
17-yanvar kúni miymanlar Moynaq rayonında bolıp, 1-sanlı ulıwma bilim beriw mektebinde oqıwshılarǵa jaratılǵan sharayatlar, materiallıq-texnikalıq baza hám tálim-tárbiya procesi, sonday-aq, 2025-jıl Investiciya baǵdarlaması sheńberinde qosımsha oqıw imaratı qurılǵan 1-sanlı qánigelestirilgen mekteptegi sharayatlar menen tanıstı.
Sapardıń ekinshi kúni bolsa, olar Nókis qalası Abat mákan MPJ aymaǵındaǵı quwatlılıǵı 1650 orınǵa mólsherlengen jańa mekteptiń qurılısı rejelestirilgen 1,4 gektar jer maydannıń kommunikaciya tarmaqlarına jalǵanıw jaǵdayı, Shımbay gúzarı MPJ aymaǵında jaylasqan 49-sanlı ulıwma orta bilim beriw mektebindegi jaratılǵan sharayatlar jaqınnan úyrendi.
Al, 19-yanvar kúni Nókis qalası Jańabazar MPJ aymaǵında bıyılǵı jılı jańadan qurılıp, paydalanıwǵa tapsırılǵan 870 oqıwshı ornına mólsherlengen 55-sanlı ulıwma orta bilim beriw mektebiniń zamanagóy bilimlendiriw ortalıǵı hám materiallıq-texnikalıq bazası menen tanıstı.
Usı kúni miymanlar Qaraqalpaqstan Respublikası Ministrler Keńesi Baslıǵınıń orınbasarı B.Utemuratov penen ushırasıp, jańa mekteplerdiń qurılısı, jaylasqan jer maydanları, texnikalıq talaplar hám joybarlaw processlerine baylanıslı áhmiyetli máselelerdi keń túrde dodaladı.

Adilbay Orazov,
Qaraqalpaqstan xabar agentligi sholıwshısı.