Qaraqalpaqstan awıl xojalıǵı hám agrotexnologiyalar institutında zamanagóy paxta terim mashinaların ele de jaqınnan tanıstırıwǵa baǵıshlanǵan seminar bolıp ótti.
Ilaj Ferǵana wálayatında Qıtay Xalıq Respublikası menen birgelikte zamanagóy paxta teriw mashinaların islep shıǵarıp atırǵan “Fergana Swan Cotton Industrial Machinery Stock Co” JShJ kárxanası tárepinen islep shıǵarılıp atırǵan “SWAN 4MZ-4” markalı paxta teriw mashinaları menen jaqınnan tanıstırıw maqsetinde ótkerilip, oǵan Awıl xojalıǵı ministriniń birinshi orınbasarı A.Xalimbetov, Agrosanaat kompleksi ústinen qadaǵalaw inspekciyasınıń Qaraqalpaqstan Respublikası basqarması, “Ózagrolizing” AJ Qaraqalpaqstan Respublikası filialı, Qaraqalpaqstan awıl xojalıǵı hám agrotexnologiyalar institutı professor-oqıtıwshıları,“Fergana Swan Cotton Industrial Machinery Stock Co” JShJ kárxanasınıń wákilleri,rayon hákimlikleriniń awıl hám suw xojalıǵı máseleleri boyınsha orınbasarları, agroinspekciya qánigeleri, klasterler, fermer xojalıqları hám awıl xojalıǵı kárxanalarınıń basshıları qatnastı.
Seminar dawamında usı jańa paxta terim mashinasınıń texnikalıq imkaniyatları, nátiyjeliligi, miynet ónimdarlıǵın arttırıwdaǵı áhmiyeti hám ámeliy qollanıw tájiriybeleri haqqında tolıq maǵlıwmatlar berilip, qatnasıwshılardıń qızıqtırǵan sorawlarına qánigeler tárepinen tolıq juwaplar berildi.
Seminar juwmaǵında zamanagóy texnikalardı awıl xojalıǵına keńnen engiziw, fermer hám klasterler menen birge islesiwdi jáne de kúsheytiw boyınsha pikir-usınıslar bildirildi.
Ilajǵa Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarov qatnastı hám shıǵıp sóyledi.

Qaraqalpaqstan xabar agentligi