Sanlı markirovkalaw sistemasınıń nátiyjeliligi arttırılıwı múnásibeti menen Ózbekstan Respublikasınıń Salıq kodeksine ózgerisler hám qosımshalar kirgizilmekte. Bul baǵdardaǵı nızam joybarı tómengi palata májilisinde kórip shıǵıldı.
Atap ótilgenindey, joybar menen “aralıqtan salıq tekseriwi” túsinigine anıqlıq kirgizilip, bul tekseriwdi ótkeriw tártibi ápiwayılastırılmaqta.
Bunnan tısqarı, markirovkalaw qaǵıydaların buzıw jaǵdayları boyınsha aralıqtan salıq tekseriwin salıq tólewshiniń janına barmastan, huqıqbuzarlıq boyınsha eki márte eskertiw berilgennen soń ótkeriw názerde tutılmaqta. Yaǵnıy, eger huqıqbuzarlıq salıq uyımlarınıń málimleme sistemaları arqalı anıqlanıp, rásmiy eskertiwden keyin de dawam etse, aralıqtan tekseriw shólkemlestirilip, akt tiykarında belgilengen muǵdarlarda járiyma qollanıladı. Isbilermenlik subekti salıq tekseriwi haqqında 10 kún aldın xabardar etiledi. Sonday-aq, bul jaǵday boyınsha qarar qabıl etiw processlerin operativ shólkemlestiriw nızamlı tiykarda belgilenbekte.
Ámeliyatta ayırım shaxslar tárepinen markirovkalaw qaǵıydaların aylanıp ótiw arqalı nızamsız dáramat alıw maqsetinde xalıqqa sapasız yamasa qálbeki ónimlerdi, sonıń ishinde, spirtli ishimlikler, temeki ónimleri, dári quralları, salqın ishimlikler hám basqa da tovarlardı realizaciyalaw jaǵdayları baqlanbaqta.
Bul nızam joybarı mine usınday huqıqbuzarlıqlardı erte anıqlaw, olardıń aldın alıw hám insaplı salıq tólewshilerdiń nızamlı máplerin qorǵaw, puqaralardıń ómiri hám densawlıǵına qáwip tuwdıratuǵın faktorlardı saplastırıwǵa qaratılǵan.
Nızam joybarında salıq qadaǵalawın ámelge asırıwda zamanagóy qatnaslardı engiziw, huqıqbuzarlıqlardı saplastırıwǵa qaratılǵan profilaktikalıq mexanizmler názerde tutılǵan.
Kirgizilip atırǵan ózgerisler hám qosımshalar jasırın aylanıs hám jasırın ekonomikaǵa qarsı gúresiw, insaplı salıq tólewshilerdiń huqıqları menen nızamlı máplerin qorǵaw, sonday-aq, byudjet dáramatlarınıń turaqlılıǵın támiyinlewde úlken áhmiyetke iye.

Muhtarama Komilova, ÓzA