“Rawajlanıw strategiyası” orayında jetilistirilip atırǵan “Ózbekstan – 2030” strategiyası joybarınıń “Bilimlendiriw sistemasın jetilistiriw: maqset hám wazıypalar” temasına baǵıshlanǵan baspasóz ánjumanı bolıp ótti.
Baspasóz ánjumanında “Rawajlanıw strategiyası” orayınıń basshısı Eldor Tulyakov házirgi kúnde “Ózbekstan – 2030” strategiyasın jetilistiriwge sebep bolǵan faktor hám máselelerge tolıq toqtap ótti.
Atap ótilgenindey, sońǵı jılları mámlekette ekonomikanı liberallastırıw, xalıqtıń bántligin támiyinlew hám insan kapitalın rawajlandırıw, sociallıq qorǵaw sistemasın jańa basqıshqa alıp shıǵıw, isbilermenlik jumısın qollap-quwatlaw, qolaylı investiciyalıq ortalıqtı qáliplestiriw jáne mámleketlik basqarıw sistemasın jetilistiriwge qaratılǵan keń kólemli reformalar ámelge asırıldı.
Búgingi kúnde dúnyada júz berip atırǵan globallıq ózgerisler, xalıqaralıq bazarlardaǵı terbelisler, sanaat hám texnologiyalardıń keskin rawajlanıwı, energiya bazarlarındaǵı transformaciya, globallıq támiynat shınjırlarınıń qayta qáliplesiwi Ózbekstannan da jańa qatnaslardı talap etpekte.
Sonıń menen birge, “Ózbekstan – 2030” strategiyasınıń jetilistiriliwi, onda belgilengen wazıypalardıń jańalanıwı mámleketimizdiń rawajlanıwı hám xalqımızdıń abadanlıǵında úlken áhmiyetke iye bolıwı jáne joybardı dodalawda keń jámiyetshiliktiń belsene qatnasıwı belgilenetuǵın wazıypalardıń jáne de jetik hám xalıqshıl bolıwın támiyinleydi.
Sonday-aq, ilajda qatnasqan ministrlikler hám uyımlardıń wákilleri de jetilistirilip atırǵan “Ózbekstan-2030” strategiyası joybarında kórsetilgen, óz baǵdarlarına baylanıslı wazıypalar hám belgilengen kórsetkishler haqqında túsinik berdi.
Sonıń ishinde, balalardı mektepke shekemgi bilimlendiriw menen qamtıp alıw dárejesin 80 procentke jetkeriw, ulıwma orta bilim beriw mákemelerin taza ishimlik suwı hám zamanagóy sanitariyalıq-gigienalıq infrastruktura menen 100 procent támiyinlew, bilimlendiriw shólkemlerine hár jılı 600 “til iyeleri” bolǵan sırt el qánigelerin tartıw, Prezident hám qánigelestirilgen mekteplerdiń bahalaw sisteması engizilgen ulıwma orta bilim beriw mákemeleriniń úlesin 100 procentke jetkeriw, talap joqarı bolǵan baǵdarlar hám alıs aymaqlardaǵı abiturientler ushın pedagogikalıq bilimlendiriw baǵdarları boyınsha mámleketlik grant tiykarında tayarlanǵan kadrlardıń úlesin 17 procentke jetkeriw wazıypaları boyınsha tolıq maǵlıwmat berdi.
Sonıń menen birge, orta arnawlı bilimlendiriw hám joqarı bilimlendiriw sistemasında jańa metodikalardı engiziw arqalı bilimlendiriw nátiyjeliligin arttırıw baǵdarında kásiplik bilimlendiriw mákemelerinde bilimlendiriwdiń sapasın arttırıw hám materiallıq-texnikalıq bazasın jetilistiriw kórsetkishin 70 procentke jetkeriw, 14 aymaqlıq aldınǵı kásiplik sheberlik texnikumların hám “Kásipler qalashası”n shólkemlestiriw, pitkeriwshilerdiń óz qánigeligi boyınsha jumısqa jaylasıwı hám 1-3 jıl dawamında qánigeligi boyınsha islew kórsetkishin 70 procentke jetkeriw, joqarı bilimlendiriw shólkemleriniń xalıqaralıq akkreditaciyadan ótken bilimlendiriw baǵdarlamaların 200 ge jetkeriw, mámleketlik byudjetten ajıratılǵan qarjılar esabınan ámelge asırılatuǵın fundamental izertlew joybarlarınıń sanın 400 ge jetkeriw, ilim tarawına Mámleketlik byudjetten ajıratılatuǵın qarjılardı jalpı ishki ónimniń 1 procent muǵdarına shekem arttırıw sıyaqlı názerde tutılǵan kórsetkishlerdiń qanday úlken áhmiyetke iye ekenligin túsindirip ótti.
Óz gezeginde baspasóz ánjumanı juwmaǵında jurnalistler ózlerin qızıqtırǵan sorawlarına tolıq juwap aldı.

ÓzA