Jer – xalıqtıń múlki. Ol mámlekettiń qorǵawında. Onı ózbasımshalıq penen iyelep alıw juwapkershilikke alıp keledi.
Tilekke qarsı ayırım puqaralar tárepinen jer uchastkaların hesh qanday hújjetsiz nızamsız túrde iyelep alıw yamasa ruqsatsız qurılıs jumısların ámelge asırıw jaǵdayları ushıraspaqta.
Kadastr agentligi Qaraqalpaqstan Respublikası basqarmasınıń maǵlıwmatlarına qaraǵanda, Nókis qalasında alıp barılǵan jer qadaǵalaw jumısları dawamında Jańa zaman MPJ aymaǵında jasawshı puqara ulıwma maydanı 89 kv.m.lik jerdi ózbasımshalıq penen iyelep qurılıs jumısların alıp barǵanı anıqlandı. Tap usınday jaǵday Jasıl baǵ MPJ aymaǵında jasawshı puqara tárepinen de islengeni anıqlanıp, ózbasımshalıq penen hesh qanday hújjetlersiz 32 kv.m.lik jerge qurılıs qurǵanı anıqlandı.
Bul eki jaǵday boyınsha ÓzR HJhKniń 60-statyası 3-bólimine tiykarlanıp hújjetler rásmiylestirilip, puqaralar tárepinen nızamsız jaǵday saplastırıldı.
Maǵlıwmat ushın, Ózbekstan Respublikasınıń 2024-jıl 5-avgusttaǵı «Ózbasımshalıq penen iyelep alınǵan jer uchastkalarına hám olarda qurılǵan imarat hám qurılmalarǵa bolǵan huqıqlardı tán alıw haqqında»ǵı Nızamında 2018-jıl 1-may kúnine shekem ózbasımshalıq penen iyelep alınǵan jer uchastkasına hám olarda qurılǵan imaratlarǵa bolǵan huqıqlar tán alınadı dep kórsetilgen.

Á.Jiyemuratov,
Qaraqalpaqstan xabar agentligi.