Moynaq rayonında xalıqtıń qolaylı hám qáwipsiz háreketleniwin támiyinlew maqsetinde keń kólemli dóretiwshilik jumıslar ámelge asırılmaqta. Atap aytqanda, Prezidentimizdiń «2020 – 2023-jıllarda Qaraqalpaqstan Respublikasın kompleksli social-ekonomikalıq rawajlandırıw ilajları haqqında»ǵı qararı tiykarında Moynaq kóshesi boylap zamanagóy talaplarǵa juwap beretuǵın piyadalar jolınıń qurılısı jedel pátlerde alıp barılmaqta. Sonıń menen birge, kóshe aymaǵında túngi jaqtılandırıw sistemaların ornatıw jumısları da izbe-iz dawam ettirilmekte.
Atap ótiw orınlı, 2025-jıl dawamında Moynaq kóshesinde jol infrastrukturasın túp-tiykarınan jaqsılawǵa qaratılǵan jumıslar tolıq juwmaqlanıp, kóshe boylap sapalı qara qaplamalı asfalt tósew jumısları tabıslı orınlandı. Bul jumıslardıń nátiyjesinde kósheniń háreketleniw qolaylıǵı hám kórinisi sezilerli dárejede jaqsılandı.
Ámelge asırılıp atırǵan bul joybarlar Moynaq rayonınıń zamanagóy kelbetin qáliplestiriw, xalıqtıń turmıs dárejesin arttırıw hám aymaqtı jáne de abat hám payızlı orınǵa aylandırıwǵa xızmet etpekte.
Bul keń kólemli jumıslardan gózlengen maqset – transport infrastrukturasın jańalaw, xalıqtıń kúndelikli turmısın jaqsılaw, aymaqlararalıq baylanıslardı bekkemlew hám ekonomikalıq belsendilikti arttırıw bolıp esaplanadı.

Qaraqalpaqstan xabar agentligi