Ózbekstan Densawlıqtı saqlaw xızmetkerleri kásiplik awqamı Respublikalıq Keńesi Miynet inspekciyasınıń 2025-jıl ushın islep-shıǵılǵan is-rejesine muwapıq tarawǵa tiyisli mákemelerde miynet nızamshılıǵı xám Qaraqalpaqstan Respublikası Densawlıqtı saqlaw ministrligi xám Ózbekstan Densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi arasında 2024-2026-jıllar ushın qabıl etilgen Aymaqlıq Jámáátlik kelisiminde belgilengen talaplarınıń orınlanıwı boyınsha jámáátlik qadaǵalawı alıp barılıp, miynet inspektorları tárepinen bir qatar medicina mákemeleri xızmetkerlerine 2025-jılda tólengen is-xaqılarınıń durıslılıǵı jaǵdayı úyrenip shıǵıldı.
Ótkerilgen úyreniwler dawamında medicina xızmetkerleri xám medicina xızmetkerlerinen tısqarı basqa xızmetkerlerge aylıq is-xaqılarına qosımsha ústeme pulları az tólengenligi, jıllıq miynet dem alısı kúnleri kem berilgenligi, arnawlı kiyim-kenshekler menen támiyinlenbegeni hám jumıs waqtında baxıtsız hádiyse nátiyjesinde jábirlengen xızmetkerge tóleniwi tiyis bolǵan kompensaciya pulı tólenbey kelingenligi anıqlandı.
Nátiyjede ótken jıl dawamında Ózbekstan Densawlıqtı saqlaw xızmetkerleri kásiplik awqamınıń Qaraqalpaqstan Respublikası boyınsha miynet inspektorları tárepinen respublikamızdaǵı densawlıqtı saqlaw tarawındaǵı mákemelerde islep atırǵan 194 xızmetkerge xızmet sapar qárejetleri ushın 215.359.971 sum, 132 xızmetkerge materiallıq járdem ushın 194.000.000 sum, 2415 xızmetkerge hár shereklik ústemeler ushın jumıs beriwshiler tárepinen jámi 1.452.311.411 sum qayta esaplanıp, olardıń tóleniwine erisildi.
Bunnan tısqarı jumıs waqtında baxıtsız hádiyse nátiyjesinde jábirlengen 1 xızmetkerge tóleniwi tiyis bolǵan 38.419.810 sum kompensaciya pulı, jıllıq miynet dem alısı kem berilgenligi esabına 26 xızmetkerge 140 680 852 sum óndirip beriliwine erisilip, jumıs beriwshiniń esabınnan 343 xızmetkerge 35.319.000 sumǵa arnawlı kiyim kenshekler alıp beriliwine xám 105.630.224 sumga 383 jumıs ornı attestaciyadan ótkeriliwine erisildi.

P.Abdiyazov,
D.Urazbaev
Ózbekstan densawlıqtı saqlaw
xızmetkerleri kásiplik awqamı
Respublikalıq Keńesiniń
Qaraqalpaqstan Respublikası
boyınsha miynet inspektorları.
Qaraqalpaqstan xabar agentligi