Xalıqaralıq ilimpazlar toparı molibden karbidi tiykarında jańa katalizator jarattı. Ol awır neft frakciyaları hám paydalanılǵan ónimlerdi qayta islew procesin bir neshe ese tezlestirip, energiya jumsalıwın sezilerli dárejede azaytadı.
Texnologiya katalizatorlardı islep shıǵarıwdıń quramalılıǵı hám qımbat bahalı metallar talap etiw mashqalasın da sheshedi. Islengen aviaciya mayın qayta islew boyınsha tájiriybelerde molibden karbidiniń nano untaǵı joqarı nátiyjelilikti kórsetti. Ol temperaturaǵa qarap quramalı uglevodorodlardıń termikalıq tarqalıw tezligin 639 procentke shekem arttırǵan hám processtiń aktivaciya energiyasın 25 procentke azaytqan.
Sonıń menen birge, katalizator tek ǵana neft ónimlerin qayta islewde emes, al kúkirtti joq etiw reakciyaları, ammiak sintezi, metandı qayta islew hám vodorod islep shıǵarıw sıyaqlı processlerde de nátiyjeli qollanılıwı múmkin.
“Ózximiyasanaat” AJ málimleme xızmetiniń málim etiwinshe, bul texnologiya tek ǵana neft-ximiya emes, al energetika hám aerokosmoslıq sanaatta da keńnen qollanıw ushın perspektivalı esaplanadı.

N.Ziyodullaeva,
ÓzA