“Ózbekstan – 2030” strategiyasında hár bir insanǵa óz potencialın júzege shıǵarıwı ushın múnásip sharayatlardı jaratıwǵa ayrıqsha itibar qaratılmaqta.
Usı baǵdarda belgilengen wazıypalar sheńberinde mektepke shekemgi bilimlendiriw sisteması jańa basqıshqa alıp shıǵıladı. Ulıwma orta bilimlendiriw sistemasında “Bilimlendiriw ushın qolaylı ortalıq” baǵdarlaması ámelge asırıladı. Professional bilimlendiriw rawajlandırıladı. Joqarı bilimlendiriw menen qamtıp alıwdı arttırıw menen birge pedagog kadrlardıń statusı arttırıladı.
Senattıń Ilim, bilimlendiriw hám densawlıqtı saqlaw máseleleri komiteti májilisinde bul haqqında sóz boldı. Ekonomikanıń eń tez rawajlanıp atırǵan tarmaqlarında ámeliy izertlewlerdi kúsheytiw hám “kárxana – joqarı bilimlendiriw mákemesi – ilimiy shólkem” birge islesiw sistemasın rawajlandırıwdıń maqsetli kórsetkishleri kórip shıǵıldı.
Densawlıqtı saqlaw tarawında xalıqtıń ortasha ómir súriw dawamlılıǵın arttırıw boyınsha maqsetli kórsetkishlerge ayrıqsha itibar qaratıldı. Sonıń ishinde, 2030-jılǵa barıp ómir súriw dawamlılıǵın 78 jasqa jetkeriw, júrek-qan tamır keselliklerinen erte ólimdi (30-69 jas) 27 procentke shekem azaytıw, rak keselliginen erte (30-69 jas) ólimdi 5,2 procentke shekem azaytıw maqset etilmekte.
Xalıqqa baslanǵısh medicinalıq xızmetlerdi jáne de jaqınlastırıw maqsetinde júrek-qan tamır, qáwipli óspeler, qantlı diabet, tuberkulyoz kesellikleri diagnozı qoyılǵan nawqaslardıń 50 procentin profilaktikalıq tekseriwlerde anıqlawdı jolǵa qoyıw, emlew mákemelerine poliklinikanıń elektron jollaması arqalı barǵan nawqaslardıń úlesin 70 procentke jetkeriw názerde tutılmaqta.
Májiliste strategiyanıń orınlanıwın támiyinlewde deputatlar hám jámietlik qadaǵalaw zárúr ekenligi atap ótildi.

N.Abduraimova,
ÓzA