Franciyada bolıp ótken Xalıqaralıq Frankofoniya shólkeminiń 19-sammiti sheńberinde erisilgen kelisimlerdiń orınlanıwın támiyinlew maqsetinde, Ózbekstan Respublikası Mektepke shekemgi hám mektep bilimlendiriw ministrligi hám “Kokoro Lingua” kompaniyası arasında birge islesiw jolǵa qoyılıp, usı tiykarda Nókis qalası 1-sanlı ulıwma orta bilim beriw mektebinde “Mámleketlik mektepke shekemgi bilimlendiriw shólkemlerinde “Kokoro Lingua” innovaciyalıq francuz tilin úyreniw platformasınan nátiyjeli paydalanıw” atamasında respublikalıq seminar shólkemlestirildi.
Seminarǵa “Kokoro Lingua” kompaniyasınıń tiykarın salıwshısı Nathalie Lesselin, Qaraqalpaqstan Respublikası Mektepke shekemgi hám mektep bilimlendiriw ministriniń orınbasarı Muhabbat Shlımbetova, Ózbekstan Respublikası Mektepke shekemgi hám mektep bilimlendiriw ministrliginiń Mektepke shekemgi bilimlendiriwdi muwapıqlastırıw departamenti qánigesi Bahromjon Ermatov, sonday-aq, respublikamızdaǵı barlıq rayon (qala) lıq mektepke shekemgi hám mektep bilimlendiriw bólimleriniń qánigeleri hám mektepke shekemgi bilimlendiriw shólkemleriniń direktor orınbasarları qatnastı.
Memorandum sheńberinde Tashkent qalasındaǵı 12 mámleketlik mektepke shekemgi bilimlendiriw shólkemi tańlap alınıp, olarda innovaciyalıq “Kokoro Lingua” platformasına jaylastırılǵan 10 videosabaq arqalı balalarǵa francuz tili biypul úyretilmekte.
– Videosabaqlardıń balalar jasına sáykesligi, qızıqlılıǵı hám nátiyjeliligi unamlı nátiyjeler berip atırǵanlıǵı sebepli, bul tájiriybeni mámleketimizdegi mektepke shekemgi bilimlendiriw shólkemlerine engiziw rejelestirilmekte, – deydi Qaraqalpaqstan Respublikası Mektepke shekemgi hám mektep bilimlendiriw ministriniń orınbasarı Muhabbat Shlımbetova. – Atap aytqanda, 2026-jıl yanvar ayınan baslap Qaraqalpaqstan Respublikasındaǵı 24 mámleketlik mektepke shekemgi bilimlendiriw shólkeminiń 71 úlken hám mektepke tayarlaw toparlarında “Kokoro Lingua” innovaciyalıq platforması arqalı francuz tilin úyretiw jolǵa qoyıladı.
Ótkerilgen seminarda “Kokoro Lingua” kompaniyasınıń tiykarın salıwshısı Nathalie Lesselin qánigelerge “Kokoro Lingua” platformasına jaylastırılǵan 10 videosabaq hám onı balalarǵa túsindiriwdiń metodları haqqında keń túrde túsinikler berdi.

Adilbay Orazov,
Qaraqalpaqstan xabar agentligi sholıwshısı.