Oliy Majlis Senatında xalıq deputatları rayon (qala)lıq keńesleriniń baslıqları hám hákimler ushın oqıw seminarları óz jumısın basladı.
Ilajdıń ashılıwında Senat Baslıǵı Tanzila Norboeva jańa konstituciyalıq sharayatta atqarıw hám wákillik hákimiyatı aldında turǵan áhmiyetli wazıypalarǵa toqtap ótti.
“Kúshli keńes, esaplı hám intaker hákim” principi jámiyette ashıq-aydınlıqtı támiyinlew, xalıq máplerine xızmet etetuǵın jumıslardıń nátiyjeliligin arttırıwda áhmiyetli orın iyeleydi.
Sebebi, reformalardan tiykarǵı maqset – atqarıw hám wákillik hákimiyatınıń jańa institucionallıq modelin jaratıw, mámleketlik basqarıwda nátiyjelilik hám esap beriwdi támiyinlew bolıp esaplanadı.
Mámleketimiz basshısınıń Oliy Majlis hám Ózbekstan xalqına jollaǵan Múrájatında alǵa qoyılǵan “reformalardı anıq ámeliy nátiyjege aylandırıw” ideyası Jańa Ózbekstan rawajlanıwınıń tiykarǵı filosofiyası ekeni atap ótildi.
Prezident tárepinen belgilep berilgen altı tiykarǵı baǵdarda jergilikli mámleketlik hákimiyat uyımlarınıń jumısındaǵı tiykarǵı wazıypalarǵa itibar qaratıldı.
Bul wazıypalardıń barlıǵı rayon hám qalalar kesiminde xalıqtıń mápleri jolında ádil qararlar qabıl etiw, juwapkershilikli qatnas jasawdı hám ámeliy nátiyjelerge erisiwdi talap etedi.
Bul oqıw seminarları aymaqlardıń qamtıp alıwı hám qatnasıwshılar sanın esapqa alǵan halda tórt toparǵa bólinip shólkemlestirilgen.
Sonıń ishinde, birinshi topar tıńlawshıları ushın sabaqlar 19-21-yanvar kúnleri ótkerilip, olarda Qaraqalpaqstan Respublikası, Buxara, Xorezm wálayatları hám Tashkent qalası deputatları hám hákimleri qatnaspaqta.
Oqıw seminarları basqıshpa-basqısh barlıq aymaqlardı qamtıp alıp, jergilikli mámleketlik hákimiyat uyımları basshılarınıń bilim hám mamanlıǵın arttırıwǵa qaratılǵan áhmiyetli oqıw-ámeliy maydan bolıp xızmet etedi.
Úsh kún dawam etetuǵın oqıw seminarları sheńberinde tıńlawshılar jergilikli keńeslerdiń jumısın jetilistiriw, hákimiyatlar bóliniwi principleri, keńes hám hákimliklerdiń óz-ara birge islesiwi, deputatlardı nızam dóretiwshiligi jumısına keńnen tartıw, qararlar qabıl etiwde nızamlılıqtı támiyinlew boyınsha ámeliy sabaqlarda óz bilim hám kónlikpelerin bekkemleydi.
Bunnan tısqarı, byudjetti qáliplestiriw, onıń orınlanıwı ústinen nátiyjeli deputatlıq qadaǵalawdı ámelge asırıw, xalıqtıń mashqalaların anıqlaw hám olardı sistemalı sheshiwde keńeslerdiń rolin kúsheytiw, sonday-aq, “máhálle jetiligi-keńes-Senat” principi tiykarında jumıstı nátiyjeli shólkemlestiriw máselelerine ayrıqsha itibar qaratıladı.

N.Abduraimova, ÓzA