Ózbekstan Respublikası Prezidentiniń ekologiya máseleleri boyınsha keńesgóyi – Ekologiya hám klimat ózgeriwi milliy komitetiniń baslıǵı Aziz Abduhakimov Qıtay Ilimler akademiyasınıń Shinjon ekologiya hám geografiya institutınıń bas direktorı CHjan Yuanmin menen ushırasıw ótkerdi.
Sóylesiw dawamında Oraylıq Aziya ekologiya hám qorshaǵan ortalıqtı izertlewler orayınıń keleshektegi jumısın qáliplestiriwge baylanıslı shólkemlestiriwshilik-huqıqıy hám strukturalıq máseleler, sonday-aq, ilimiy-ekologiyalıq tarawda eki tárepleme birge islesiw perspektivası dodalandı.
Komitettiń málim etiwinshe, sóylesiwler waqtında oraydı shólkemlestiriwdiń múmkin bolǵan modelleri, onıń kadrlar potencialın basqıshpa-basqısh rawajlandırıw, sonıń ishinde, turaqlı hám joybar tiykarındaǵı lawazımlardı anıq belgilew máselelerine ayrıqsha itibar qaratıldı.
Qıtay tárepi oraydıń jumısın investiciyalıq qollap-quwatlaw boyınsha óz usınısların alǵa qoydı. Atap aytqanda, joybar sheńberinde strukturanı zamanagóy ilimiy hám laboratoriyalıq úskeneler menen támiyinlew máselesi kórip shıǵıldı. Óz gezeginde, Ózbekstan tárepi zárúr infrastrukturanı támiyinlew hám oraydıń tolıq jumıs alıp barıwı ushın qolaylı sharayatlar jaratıwǵa tayar ekenin bildirdi.
Shinjon ekologiya hám geografiya institutınıń 2026-jılǵa mólsherlengen jumıs baǵdarlaması tanıstırıldı. Onda oraydı dizimnen ótkeriw, birge islesiw baylanısların rawajlandırıw, birgeliktegi ilimiy-izertlew joybarların islep shıǵıw, ilimiy potencialdı arttırıw, kadrlar tayarlaw hám jumıstı málimleme jaǵınan sáwlelendiriw boyınsha ilajlar názerde tutılǵan.
Májilistiń tiykarǵı bólimi bolsa geografiya, ekologiya, qurǵaq hám yarım qurǵaq aymaqlardıń tábiyǵıy resursları, turaqlı rawajlanıw hám regionallıq izertlewlerge qánigelesken xalıqaralıq abıraylı ilimiy jurnallar – “Regional Sustainability” hám “Journal of Arid Land” basılımlarınıń jergilikli redakciyasın shólkemlestiriw perspektivasına baǵıshlandı.
Ushırasıw juwmaǵında tárepler konstruktivlik sóylesiwdi dawam ettiriwden óz-ara mápdar ekenin tastıyıqlap, erisilgen kelisimlerdi jáne de tereń islep shıǵıw boyınsha kelisip aldı.

B.Xudoyberdiev, ÓzA